اسلام آباد: وزیراعظم شہباز شریف کی دعوت پر متحدہ عرب امارات کے صدر شیخ محمد بن زاید النہیان آج سرکاری دورے پر پاکستان پہنچیں گے، جہاں ان کے اعزاز میں اعلیٰ سطحی ملاقاتوں کا اہتمام کیا گیا ہے۔
دورے کے دوران معزز مہمان کی صدرِ مملکت آصف علی زرداری، وزیراعظم شہباز شریف سمیت دیگر اعلیٰ شخصیات سے ملاقاتیں شیڈول ہیں، جن میں دوطرفہ تعلقات اور باہمی تعاون کے مختلف پہلوؤں پر تبادلہ خیال کیا جائے گا۔
ترجمان دفتر خارجہ کے مطابق متحدہ عرب امارات کے صدر کا یہ دورہ دوطرفہ تجارت، سرمایہ کاری، توانائی اور ترقی سمیت مختلف شعبوں میں تعاون کو فروغ دینے میں معاون ثابت ہوگا، جبکہ دونوں ممالک کے تعلقات کو مزید مضبوط بنانے کے امکانات بھی زیرِ غور آئیں گے۔
صدر متحدہ عرب امارات کے دورہ پاکستان کے تناظر میں وفاقی دارالحکومت اسلام آباد میں عام تعطیل کا اعلان کر دیا گیا ہے، جس کے تحت اسلام آباد کی حدود میں واقع پاکستان سیکرٹریٹ اور تمام وفاقی ادارے بند رہیں گے۔
اسی طرح سینیٹ سیکرٹریٹ اور قومی اسمبلی سیکرٹریٹ بھی آج بند رہیں گے، جبکہ اسلام آباد ہائیکورٹ نے بھی آج چھٹی کا اعلان کیا ہے۔ رجسٹرار اسلام آباد ہائیکورٹ کے نوٹیفکیشن کے مطابق اسلام آباد ہائیکورٹ اور اسلام آباد ڈسٹرکٹ کورٹس 26 دسمبر کو بند رہیں گی۔
وفاقی آئینی عدالت کے رجسٹرار نے بھی آج کی کاز لسٹ منسوخ کرتے ہوئے عام تعطیل کا نوٹیفکیشن جاری کر دیا ہے۔
کابینہ ڈویژن کی جانب سے جاری نوٹیفکیشن کے مطابق آج اسلام آباد کے اسپتال، بینک، ضروری سروسز کے دفاتر، میٹرو پولیٹن کارپوریشن، سی ڈی اے دفاتر، اسلام آباد انتظامیہ، پولیس، آئیسکو اور سوئی ناردرن گیس کے دفاتر معمول کے مطابق کھلے رہیں گے۔
