اسلام آباد: چیئرمین پاکستان تحریک انصاف بیرسٹر گوہر علی خان نے وزیراعظم شہباز شریف سے مذاکرات اور ملاقات کے دعوؤں کو مسترد کرتے ہوئے واضح کیا ہے کہ ان کا وزیراعظم سے نہ حالیہ دنوں میں اور نہ ہی پورے سال کے دوران کوئی رابطہ ہوا ہے۔
بیرسٹر گوہر نے وزیراعظم کے کوآرڈینیٹر اختیار ولی کے مذاکرات سے متعلق بیان پر ردِعمل دیتے ہوئے کہا کہ گزشتہ دس دن تو درکنار، پورے سال میں بھی وزیراعظم سے ان کا کوئی رابطہ نہیں ہوا، اگر کبھی رابطہ ہوا یا انہوں نے خود کوئی رابطہ کیا تو وہ اس بارے میں عوام کو ضرور آگاہ کریں گے۔
انہوں نے کہا کہ بات چیت اور مذاکرات ایک سنجیدہ اور اہم معاملہ ہیں، اس پر غیر ذمہ دارانہ اور غیر سنجیدہ گفتگو نہیں کی جانی چاہیے کیونکہ اس سے حالات مزید خراب ہو سکتے ہیں۔
واضح رہے کہ گزشتہ روز ایک ٹی وی مارننگ شو میں اختیار ولی خان نے دعویٰ کیا تھا کہ بیرسٹر گوہر نے دس دنوں میں تین مرتبہ وزیراعظم سے مذاکرات کے لیے رابطہ کیا تھا، تاہم چیئرمین پی ٹی آئی نے اس دعوے کو یکسر مسترد کر دیا ہے۔
