اسلام آباد: نائب وزیراعظم اور وزیر خارجہ اسحاق ڈار سے صومالیہ کے وزیر خارجہ عبدالسلام عبدی علی نے ٹیلی فونک رابطہ کیا، جس میں باہمی امور اور علاقائی صورتحال پر تبادلہ خیال کیا گیا۔
ترجمان دفتر خارجہ کے مطابق صومالی وزیر خارجہ نے اقوام متحدہ کی سلامتی کونسل میں صومالیہ کے تحفظات کے حوالے سے پاکستان سے تعاون کی درخواست کی، جس پر پاکستان نے مکمل حمایت کا یقین دلایا۔
اسحاق ڈار نے گفتگو کے دوران صومالیہ کی خودمختاری اور علاقائی سالمیت کے لیے پاکستان کی غیر متزلزل حمایت کا اعادہ کیا اور کہا کہ پاکستان صومالیہ کے جائز مؤقف کے ساتھ کھڑا رہے گا۔
ترجمان دفتر خارجہ کے مطابق پاکستان کی جانب سے اقوام متحدہ اور دیگر کثیرالجہتی فورمز پر بھی صومالیہ کی بھرپور حمایت کی یقین دہانی کرائی گئی ہے۔
صومالی وزیر خارجہ عبدالسلام عبدی علی نے پاکستان کی مسلسل حمایت پر شکریہ ادا کیا اور اسے دونوں ممالک کے قریبی تعلقات کی عکاسی قرار دیا۔
خیال رہے کہ اسرائیل کی جانب سے صومالیہ کی ریاست صومالی لینڈ کو خودمختار ریاست تسلیم کرنے کے اقدام پر اقوام متحدہ کی سلامتی کونسل کا ہنگامی اجلاس طلب کیا گیا ہے۔
عرب میڈیا کے مطابق صومالیہ کی درخواست پر سلامتی کونسل کا ہنگامی اجلاس پیر کو منعقد ہوگا۔
