نئے سال کے موقع پر کراچی کے مختلف علاقوں میں ہوائی فائرنگ کے واقعات پیش آئے، جن کے نتیجے میں مجموعی طور پر 25 افراد زخمی ہو گئے، جس سے شہریوں میں خوف و ہراس پھیل گیا۔
پولیس کے مطابق زخمی ہونے والوں میں بچیاں اور خواتین بھی شامل ہیں، جبکہ شہر کے مختلف علاقوں میں کارروائیوں کے دوران ہوائی فائرنگ میں ملوث 56 افراد کو گرفتار کر لیا گیا ہے، جن کے خلاف قانونی کارروائی جاری ہے۔
ریسکیو ذرائع کے مطابق کورنگی، گولیمار، فائیو اسٹار اور نیو سبزی منڈی سمیت مختلف علاقوں میں ہونے والی ہوائی فائرنگ کے باعث شہری زخمی ہوئے، جنہیں فوری طور پر طبی امداد کے لیے اسپتال منتقل کیا گیا۔
ادھر حیدر آباد میں بھی سال نو کی خوشی میں کی گئی ہوائی فائرنگ سے 4 افراد زخمی ہوئے، جبکہ نواب شاہ میں پیش آنے والے ایسے ہی واقعات میں 2 افراد کے زخمی ہونے کی اطلاعات سامنے آئی ہیں۔
خیال رہے کہ سال نو کے موقع پر محکمہ داخلہ سندھ کی جانب سے کراچی میں اسلحے کی نمائش اور ہوائی فائرنگ پر مکمل پابندی عائد کرنے کا باقاعدہ نوٹیفکیشن جاری کیا گیا تھا، تاکہ کسی بھی ناخوشگوار واقعے سے بچا جا سکے۔
پولیس نے ہوائی فائرنگ کرنے والوں کی نشاندہی اور مؤثر نگرانی کے لیے ڈرون کیمرے اڑانے کا بھی فیصلہ کیا تھا، تاکہ قانون شکنی میں ملوث افراد کے خلاف بروقت کارروائی کی جا سکے۔
پولیس کے مطابق لیاقت آباد، شریف آباد، عزیزآباد، ناظم آباد اور دیگر حساس علاقوں میں ڈرون کیمروں کے استعمال کا فیصلہ کیا گیا، جبکہ ہوائی فائرنگ کرنے والوں کی ویڈیو ریکارڈ کرکے ان کے خلاف مقدمات درج کیے جائیں گے۔
پولیس حکام کا کہنا ہے کہ اس مقصد کے لیے 16 سے زائد تھانوں کو ڈرون کیمرے فراہم کیے گئے ہیں، تاکہ شہر بھر میں مؤثر نگرانی کو یقینی بنایا جا سکے۔
