گلوبل اکنامک گیلپ سروے کے مطابق پاکستان نے معیشت اور امن کے حوالے سے بھارت کو پیچھے چھوڑتے ہوئے نمایاں بہتری کا مظاہرہ کیا ہے، جسے عوامی رائے میں ایک مثبت پیش رفت قرار دیا جا رہا ہے۔
گیلپ سروے کے مطابق سال 2026 کے آغاز پر پاکستان نے اقتصادیات اور امن کے شعبوں میں نسبتاً بہتر کارکردگی دکھائی، جبکہ ساٹھ ممالک میں کیے گئے اس گلوبل اکنامک گیلپ سروے کے نتائج سے ظاہر ہوتا ہے کہ پاکستان نہ صرف بھارت بلکہ عالمی اوسط سے بھی آگے رہا ہے۔
سروے میں بتایا گیا ہے کہ پاکستان میں 51 فیصد افراد آنے والے سال کے بارے میں پُرامید ہیں، جبکہ مجموعی طور پر 31 فیصد لوگوں نے مستقبل کے حوالے سے مثبت رائے کا اظہار کیا ہے، جو عوامی اعتماد کی عکاسی کرتا ہے۔
گلوبل اکنامک گیلپ سروے کے مطابق اقتصادی حوالے سے 53 فیصد پاکستانیوں کا خیال ہے کہ سال 2026 خوشحالی کا سال ثابت ہو گا، جبکہ یہ شرح بھارت میں 39 فیصد ریکارڈ کی گئی، جو پاکستان کے مقابلے میں خاصی کم ہے، اسی طرح یہ عالمی اوسط 24 فیصد سے بھی نمایاں طور پر زیادہ ہے۔
سروے میں یہ بھی بتایا گیا ہے کہ امن کے حوالے سے پاکستان نے بہتر کارکردگی دکھائی ہے، جہاں 52 فیصد پاکستانیوں کو امید ہے کہ دنیا میں امن کی صورتحال بہتر ہو گی، جبکہ بھارت میں امن کے بارے میں یہ شرح صرف 26 فیصد رہی ہے۔
گیلپ سروے کے مطابق پاکستان میں امن کے حوالے سے امید کی یہ سطح سن 1994 کے بعد ریکارڈ کی جانے والی بلند ترین سطحوں میں سے ایک قرار دی جا رہی ہے، جو عوامی سوچ میں ایک اہم تبدیلی کی نشاندہی کرتی ہے۔
