کراچی: پاکستان نے بنگلادیش کی قومی ائیرلائن کو براہ راست پروازوں کی اجازت دے دی ہے، جس کے بعد دونوں ممالک کے درمیان فضائی روابط میں ایک اہم پیش رفت سامنے آئی ہے۔
ذرائع کے مطابق پاکستان سول ایوی ایشن اتھارٹی نے بنگلادیش کی قومی ائیرلائن کو ڈھاکا سے کراچی کے لیے براہ راست پروازیں چلانے کی اجازت دے دی ہے، جس سے مسافروں کو سفری سہولت میسر آئے گی۔
ذرائع کا کہنا ہے کہ وفاقی حکومت کی باضابطہ منظوری کے بعد ڈائریکٹر جنرل سول ایوی ایشن اتھارٹی نے بنگلادیشی ائیرلائن کو براہ راست پروازوں کی اجازت جاری کی، جس کے بعد انتظامی کارروائی مکمل کی گئی۔
ذرائع کے مطابق ابتدائی طور پر بنگلادیش کی قومی ائیرلائن کو 30 مارچ 2026 تک براہ راست پروازیں چلانے کی اجازت دی گئی ہے، جبکہ منظور شدہ روٹ پر پاکستان کی فضائی حدود استعمال کرنے کی بھی اجازت فراہم کر دی گئی ہے۔
سول ایوی ایشن اتھارٹی کے ذرائع کا کہنا ہے کہ بنگلادیش کی قومی ائیرلائن کو پاکستان کی فضائی حدود میں طے شدہ روٹس پر ہی پرواز کرنا ہو گی، جبکہ ڈھاکا سے کراچی روانگی سے قبل فلائٹ سے متعلق مکمل تفصیلات کراچی ائیرپورٹ انتظامیہ کو فراہم کرنا لازم ہو گا۔
ذرائع سول ایوی ایشن کے مطابق پاکستان اور بنگلادیش کے درمیان براہ راست پروازوں کا آغاز رواں ماہ متوقع ہے، جس سے دونوں ممالک کے درمیان سفری اور تجارتی روابط میں مزید بہتری آنے کا امکان ظاہر کیا جا رہا ہے۔
