راولپنڈی: خیبرپختونخوا کے مختلف علاقوں میں سکیورٹی فورسز اور پولیس کی جانب سے کی جانے والی دو الگ الگ کارروائیوں کے دوران مجموعی طور پر 11 خوارج ہلاک ہو گئے ہیں، جبکہ علاقے میں کلیئرنس آپریشن بدستور جاری ہے۔
پاک فوج کے شعبہ تعلقات عامہ آئی ایس پی آر کے مطابق شمالی وزیرستان میں خفیہ معلومات کی بنیاد پر انٹیلی جنس بیسڈ آپریشن کیا گیا، جس کے دوران سکیورٹی فورسز اور خوارج کے درمیان شدید فائرنگ کا تبادلہ ہوا۔ اس کارروائی کے نتیجے میں 6 خوارج ہلاک ہو گئے۔
آئی ایس پی آر کے مطابق ضلع کرم میں پولیس اور سکیورٹی فورسز کی مشترکہ کارروائی کے دوران مزید 5 خوارج کو ہلاک کیا گیا۔ کارروائی کے دوران ہلاک ہونے والے خوارج کے قبضے سے اسلحہ اور گولہ بارود بھی برآمد ہوا ہے۔
فوجی ترجمان کا کہنا ہے کہ ہلاک ہونے والے خوارج کا تعلق بھارتی پراکسی فتنہ الخوارج سے تھا اور یہ عناصر دہشتگردی کی متعدد کارروائیوں اور ٹارگٹ کلنگ میں ملوث رہے ہیں۔
آئی ایس پی آر کے مطابق سکیورٹی فورسز اور پولیس کی جانب سے علاقے میں کلیئرنس آپریشن جاری ہے اور مزید خوارج کی تلاش کا عمل بھی جاری رکھا گیا ہے۔ بیان میں کہا گیا ہے کہ عزمِ استحکام کے تحت انسداد دہشتگردی مہم پوری شدت کے ساتھ جاری رہے گی اور غیرملکی سرپرستی یافتہ دہشتگردی کے مکمل خاتمے تک کارروائیاں جاری رہیں گی۔
