کراچی میں سندھ بلڈنگ کنٹرول اتھارٹی نے سابق صدر مملکت عارف علوی کا ڈینٹل کلینک ڈی سیل کر دیا ہے، جس کے بعد اس حوالے سے جاری قانونی کارروائی کا ایک اہم مرحلہ مکمل ہو گیا ہے۔
سندھ ہائیکورٹ کے آئینی بینچ نے سابق صدر عارف علوی کے ڈینٹل کلینک کو سیل کیے جانے کے معاملے پر دائر توہینِ عدالت کی درخواست پر سماعت کی، جس دوران کیس سے متعلق پیش رفت عدالت کے سامنے رکھی گئی۔
سماعت کے دوران بیرسٹر علی طاہر نے عدالت کو آگاہ کیا کہ سندھ بلڈنگ کنٹرول اتھارٹی نے توہینِ عدالت کی درخواست دائر ہونے کے بعد ڈینٹل کلینک کو ڈی سیل کر دیا ہے، جس سے درخواست گزار کے تحفظات دور ہو گئے ہیں۔
بیرسٹر علی طاہر نے عدالت میں مؤقف اختیار کیا کہ کلینک ڈی سیل کیے جانے کے بعد وہ اس کیس میں مزید کارروائی نہیں چاہتے اور درخواست واپس لینا چاہتے ہیں۔
عدالت نے درخواست گزار کے مؤقف کو ریکارڈ پر لیتے ہوئے ڈی جی سندھ بلڈنگ کنٹرول اتھارٹی اور دیگر کے خلاف دائر توہینِ عدالت کی درخواست واپس لینے کی بنیاد پر نمٹا دی۔
