کراچی کے مصروف علاقے ایم اے جناح روڈ پر واقع گل پلازہ میں لگنے والی شدید آگ کے دوران عمارت کی پہلی منزل پر قائم مسجد معجزانہ طور پر محفوظ رہی، جس پر شہریوں کی جانب سے حیرت اور عقیدت کا اظہار کیا جا رہا ہے۔
تیسرے درجے کی شدید آتشزدگی کے باوجود جب ریسکیو ٹیمیں پہلی مرتبہ مسجد کے اندر داخل ہوئیں تو وہاں شدید دھواں موجود تھا، تاہم مسجد کے اندر رکھے قرآنِ پاک کے نسخے مکمل طور پر محفوظ پائے گئے۔
ریسکیو ذرائع کے مطابق مسجد کے ریک میں موجود قرآنِ پاک کے تمام نسخے اپنی جگہ موجود تھے اور ایک بھی قرآنِ مجید زمین پر نہیں گرا، جو اس شدید آگ کے تناظر میں غیر معمولی واقعہ قرار دیا جا رہا ہے۔
اسی طرح مسجد میں بچھائی گئی دریاں اور دیگر مذہبی سامان بھی اپنی اصل حالت میں محفوظ پائے گئے، حالانکہ عمارت کے دیگر حصے آگ سے بری طرح متاثر ہوئے تھے، جسے دیکھ کر ریسکیو اہلکار بھی حیران رہ گئے۔
ریسکیو حکام کے مطابق گل پلازہ کے پہلے فلور پر قائم مسجد کو کلیئر کر دیا گیا ہے اور اس بات کی تصدیق کر دی گئی ہے کہ مسجد کے اندر کوئی شخص موجود نہیں تھا۔
ریسکیو ذرائع کا کہنا ہے کہ گل پلازہ میں فائر فائٹنگ، سرچنگ اور ریسکیو آپریشن بدستور جاری ہے، جبکہ عمارت کے دیگر حصوں میں ممکنہ طور پر پھنسے افراد کی تلاش کا عمل بھی جاری رکھا گیا ہے۔
واضح رہے کہ شہر قائد میں ہفتہ اور اتوار کی درمیانی شب ایم اے جناح روڈ پر واقع گل پلازہ مارکیٹ میں لگنے والی آگ کے نتیجے میں جاں بحق افراد کی تعداد 26 ہو چکی ہے، جبکہ 83 افراد تاحال لاپتا ہیں۔
