گورنر خیبرپختونخوا فیصل کریم کنڈی نے کہا ہے کہ گل پلازہ کے افسوسناک واقعے کو سیاسی مقاصد کے لیے استعمال نہیں کیا جانا چاہیے اور اس سانحے پر سیاست سے گریز ضروری ہے۔
گورنر ہاؤس میں میڈیا سے گفتگو کرتے ہوئے فیصل کریم کنڈی کا کہنا تھا کہ سیاسی جماعتوں کے اندر بعض عناصر ایسے مواقع پر دراڑیں ڈالنے کی کوشش کرتے ہیں، تاہم کسی ایک واقعے کی بنیاد پر کسی دوسری صوبائی حکومت کو موردِ الزام ٹھہرانا درست طرزِ عمل نہیں۔ انہوں نے واضح کیا کہ گل پلازہ کے واقعے کی مکمل اور شفاف انکوائری جاری ہے اور حقائق سامنے آنے کے بعد ہی ذمہ داری کا تعین کیا جائے گا۔
دوسری جانب میئر کراچی مرتضیٰ وہاب سانحہ گل پلازہ سے متاثرہ خاندان کے گھر پہنچے جہاں انہوں نے اہلِ خانہ سے تعزیت کی۔ میئر کراچی نے اس موقع پر کہا کہ متاثرین کی مکمل بحالی تک وہ چین سے نہیں بیٹھیں گے اور متاثرہ خاندان کے کاروبار کی بحالی کے لیے ہر ممکن اقدامات کیے جائیں گے۔
مرتضیٰ وہاب نے بتایا کہ بلدیہ عظمیٰ کراچی کے ریسکیو اہلکار تاحال جائے وقوعہ پر ریسکیو آپریشن میں مصروف ہیں اور امدادی سرگرمیاں مسلسل جاری رکھی جا رہی ہیں۔
