آذربائیجان کی ایک کمپنی نے پاکستان کے تیل اور گیس کے شعبے میں سرمایہ کاری کا باضابطہ اعلان کر دیا ہے، جسے ملک میں غیر ملکی سرمایہ کاری کے فروغ کی جانب ایک اہم پیش رفت قرار دیا جا رہا ہے۔
وزیر خزانہ محمد اورنگزیب کی زیر صدارت سوئٹزرلینڈ کے شہر ڈیووس میں بزنس راؤنڈ ٹیبل کا انعقاد ہوا، جس میں عالمی سطح کی معروف کمپنیوں کے چیف ایگزیکٹو افسران اور سینئر حکام نے شرکت کی۔ اجلاس کے دوران پاکستان میں جاری اصلاحاتی اقدامات، سرمایہ کاری کے مواقع اور مستقبل کے معاشی امکانات پر تفصیلی تبادلہ خیال کیا گیا۔
وزارت خزانہ کے جاری کردہ اعلامیے کے مطابق آذربائیجان کی کمپنی کی جانب سے پاکستان کے تیل اور گیس کے شعبے میں سرمایہ کاری کے اعلان کا وزیر خزانہ محمد اورنگزیب نے خیر مقدم کیا اور ٹیکس نظام کو مزید مضبوط اور مؤثر بنانے کے حکومتی عزم کا اعادہ کیا۔
اعلامیے میں مزید بتایا گیا کہ اس موقع پر وزیر خزانہ محمد اورنگزیب اور بل گیٹس کے درمیان بھی ملاقات ہوئی، جس میں پاکستان میں صحت کے شعبے اور ادارہ جاتی اصلاحات میں تعاون کو فروغ دینے پر اتفاق کیا گیا۔
وزیر خزانہ نے ٹیکس نظام کی ڈیجیٹلائزیشن کے لیے گیٹس فاؤنڈیشن کے تعاون پر اظہار تشکر کرتے ہوئے کہا کہ یہ اقدامات شفافیت اور معاشی بہتری میں اہم کردار ادا کریں گے۔
