ٹی ٹوئنٹی ورلڈ کپ کے پہلے میچ میں پاکستان کے کپتان سلمان علی آغا نے ٹاس جیت کر نیدرلینڈز کو پہلے بیٹنگ کی دعوت دی، جس کے بعد پاکستانی بولرز نے منظم اور مؤثر کارکردگی کا مظاہرہ کرتے ہوئے حریف ٹیم کو بڑا اسکور بنانے سے روک دیا۔
نیدرلینڈز کی جانب سے مائیکل لیوٹ اور میکس اوڈووڈ نے اننگز کا آغاز کیا اور دونوں اوپنرز نے ابتدائی طور پر 28 رنز جوڑے، تاہم میکس اوڈووڈ 5 رنز بنا کر سلمان مرزا کی گیند پر آؤٹ ہو گئے۔ اس کے بعد مائیکل لیوٹ بھی محمد نواز کی گیند پر وکٹ گنوا بیٹھے، انہوں نے 24 رنز اسکور کیے۔
نیدرلینڈز کے تیسرے آؤٹ ہونے والے کھلاڑی ایکرمین تھے جو 20 رنز بنا سکے، جبکہ ڈاس ڈی لیڈ 30 رنز بنا کر محمد نواز کا دوسرا شکار بنے۔ محمد ابرار نے پانچویں وکٹ حاصل کی، اس کے بعد صائم ایوب نے مسلسل دو کھلاڑیوں کو آؤٹ کر کے دباؤ مزید بڑھا دیا۔
نیدرلینڈز کے آٹھویں آؤٹ ہونے والے کھلاڑی وین ڈر مرفی تھے، جنہیں شاہین شاہ آفریدی کی گیند پر سلمان علی آغا نے کیچ آؤٹ کیا۔ آخری اوور میں سلمان مرزا نے مزید دو وکٹیں حاصل کیں اور اس طرح پوری ڈچ ٹیم 147 رنز بنا کر آؤٹ ہو گئی۔
پاکستان کی جانب سے سلمان مرزا نے 3 وکٹیں حاصل کیں، جبکہ صائم ایوب، محمد نواز اور ابرار احمد نے 2، 2 کھلاڑیوں کو پویلین بھیجا، ایک وکٹ شاہین آفریدی کے حصے میں آئی۔
یہ میچ کولمبو کے سنہالی اسپورٹس کلب گراؤنڈ میں کھیلا جا رہا ہے۔ اس موقع پر پریس کانفرنس میں بات کرتے ہوئے کپتان سلمان علی آغا نے واضح کیا کہ وہ نمبر تین پر ہی بیٹنگ کریں گے اور فی الحال بیٹنگ آرڈر میں کسی تبدیلی کی ضرورت محسوس نہیں کی جا رہی۔
بھارت کے خلاف میچ سے متعلق حکومتی فیصلے پر گفتگو کرتے ہوئے سلمان علی آغا نے کہا کہ اس فیصلے کے بعد ٹیم پر اضافی دباؤ نہیں ہوگا اور پاکستان ہر میچ میں اپنی حکمتِ عملی کے مطابق کھیل پیش کرے گا۔
پاکستان ٹیم شاندار فارم کے ساتھ ٹورنامنٹ میں شریک ہے، جبکہ نیدرلینڈز کی ٹیم، جو جون کے بعد کوئی باقاعدہ ٹی ٹوئنٹی انٹرنیشنل نہیں کھیل سکی، اس بڑے مقابلے میں اپنی صلاحیت ثابت کرنے کے لیے پُرعزم دکھائی دے رہی ہے۔
