اقوام متحدہ میں پاکستان کے مستقل مندوب عاصم افتخار نے افغانستان کی سرزمین پر دہشت گرد تنظیموں کی موجودگی پر گہری تشویش ظاہر کی ہے۔
سلامتی کونسل کے اجلاس سے خطاب کرتے ہوئے انہوں نے کہا کہ افغان سرزمین کو دہشت گردی کی سرگرمیوں کے لیے استعمال کیا جا رہا ہے، جو خطے کے امن و استحکام کے لیے سنگین خطرہ ہے۔
انہوں نے نشاندہی کی کہ حالیہ دہشت گرد حملوں میں 80 معصوم پاکستانی جان کی بازی ہار چکے ہیں اور ان کارروائیوں کی منصوبہ بندی افغان سرزمین پر کی گئی۔ ان کے بقول یہ عناصر مسلسل پاکستان کے خلاف دہشت گردی میں ملوث رہے ہیں۔
عاصم افتخار نے سلامتی کونسل پر زور دیا کہ وہ اس بات کو یقینی بنائے کہ طالبان حکومت افغانستان کی زمین کو پاکستان یا کسی بھی دوسرے ملک کے خلاف استعمال ہونے سے روکے۔
پاکستانی مندوب نے افغانستان میں جاری انسانی بحران اور خواتین کے حقوق کی خلاف ورزیوں پر بھی تشویش کا اظہار کرتے ہوئے عالمی برادری سے مؤثر اقدامات کی اپیل کی۔
