برطانوی جریدے فنانشل ٹائمز نے چیف آف ڈیفنس فورسز فیلڈ مارشل عاصم منیر کی مؤثر اور متاثر کن قیادت کا اعتراف کرتے ہوئے انہیں بدلتے ہوئے عالمی نظام میں ایک مضبوط اسٹریٹجک رہنما قرار دیا ہے۔
فنانشل ٹائمز کے مطابق فیلڈ مارشل عاصم منیر کثیر الجہتی خارجہ پالیسی کے ماہر ہیں اور بدلتی عالمی سیاست کے تناظر میں درمیانی طاقتوں کے لیے سامنے آنے والے پیچیدہ چیلنجز کو بخوبی سمجھتے ہیں۔ رپورٹ میں کہا گیا ہے کہ موجودہ عالمی حالات نے مڈل پاورز کے لیے ایک نیا مگر مشکل دور شروع کر دیا ہے، جس میں توازن برقرار رکھنا خاصا چیلنجنگ بن چکا ہے۔
جریدے کے مطابق فیلڈ مارشل عاصم منیر دنیا کی درمیانی طاقتوں میں سب سے کامیاب ملٹی الائنرز میں شمار ہوتے ہیں، جبکہ سابق امریکی صدر ڈونلڈ ٹرمپ کے ساتھ مؤثر ہم آہنگی قائم کرنے میں بھی پاکستان کے عسکری سربراہ نمایاں رہے۔
فنانشل ٹائمز نے فیلڈ مارشل عاصم منیر کو مڈل پاور سفارتکاری کی کامیاب مثال قرار دیتے ہوئے لکھا کہ پاکستان کی قیادت نے واشنگٹن، بیجنگ، ریاض اور تہران کے ساتھ بیک وقت فعال روابط قائم رکھے۔ رپورٹ کے مطابق بدلتے عالمی ماحول میں پاکستان کی سفارتکاری کو مؤثر انداز میں آگے بڑھایا گیا۔
جریدے کا کہنا ہے کہ ٹرمپ کے ساتھ بروقت خوش اسلوبی اور نرم سفارتی رویہ پاکستان کے لیے فائدہ مند ثابت ہوا، جس کے نتیجے میں سفارتی سطح پر پاکستان کو کامیابی ملی جبکہ بھارت کو مایوسی کا سامنا کرنا پڑا۔ فنانشل ٹائمز کے مطابق بھارت بدلتے عالمی حالات اور ٹرمپ کے اندازِ سیاست سے ہم آہنگ ہونے میں ناکام رہا، جس کے باعث اسے مڈل پاور حکمت عملی میں مشکلات کا سامنا ہے۔
