سعودی عرب کی وزارتِ حج و عمرہ نے عمرہ زائرین کے لیے نئی پالیسی جاری کرتے ہوئے عمرہ ویزا کے ضوابط میں اہم تبدیلی کا اعلان کیا ہے۔ نئے قانون کے تحت عمرہ ویزا حاصل کرنے کے بعد زائرین کو 30 دن کے اندر سعودی عرب کا سفر کرنا لازمی ہوگا، بصورت دیگر ویزا خود بخود منسوخ ہو جائے گا۔
وزارت کے مطابق، ویزا ملنے کے بعد سعودی عرب میں داخلے کی مدت کو تین ماہ سے کم کرکے ایک ماہ کر دیا گیا ہے۔ تاہم، سعودی عرب پہنچنے کے بعد زائرین کو قیام کے لیے پہلے کی طرح تین ماہ کا وقت ہی دیا جائے گا۔
سعودی عرب کی قومی کمیٹی برائے عمرہ کے مشیر احمد باجیفر کے مطابق، نئے ضوابط آئندہ ہفتے سے نافذ ہوں گے۔ ان کا کہنا ہے کہ یہ اقدام وزارتِ حج و عمرہ نے عمرہ زائرین کی بڑھتی ہوئی تعداد اور انتظامی سہولت کے پیش نظر کیا ہے۔
عرب نیوز کے مطابق، رواں سال جون سے اب تک 40 لاکھ سے زائد بین الاقوامی زائرین کے لیے عمرہ ویزے جاری کیے جا چکے ہیں، جو گزشتہ برسوں کے مقابلے میں ایک نیا ریکارڈ ہے۔
نئی پالیسی کے بعد عمرہ زائرین کو اپنے سفر کی منصوبہ بندی زیادہ محتاط انداز میں کرنا ہوگی، تاکہ مقررہ مدت کے اندر سعودی عرب میں داخلہ یقینی بنایا جا سکے۔
