کراچی امیر جماعت اسلامی کراچی حافظ نعیم الرحمان کا کہنا ہے کہ حکمرانوں کو عوام کے ٹیکس پر عیاشیاں نہیں کرنے دیں گے۔
بجلی کے زائد بلوں، پیٹرول کی قیمت میں اضافے اور مہنگائی کے خلاف جماعت اسلامی نے کراچی میں 15 مقامات پر احتجاج کیا جس کے باعث لوگ سڑکوں پر نکل آئے اور گاڑیاں بند کرکے احتجاجاً ہارن بھی بجائے۔
حافظ نعیم الرحمان نے کہا کہ حکمرانوں نے ہمارا راستہ روکا تو ہم ان کا راستہ روکیں گے، انہیں عوام کے ٹیکس پر عیاشیاں نہیں کرنے دیں گے۔
انہوں نے کہا کہ عوام کے پاس ایک ہی راستہ ہے کہ پرامن مزاحمت کریں۔
حافظ نعیم الرحمان نے کہا کہ سرکاری افسران اور وزیروں کے ساتھ کارواں چلتے ہیں، ان گاڑیوں کو فری پیٹرول ملتا ہے، جس کی قیمت عوام سے وصول کی جارہی ہے۔
انہوں نے کہا کہ عوام اپنے اور اپنے بچوں کے بہتر مستقبل،ظالم حکمرانوں سے نجات کے لیے پر امن و منظم مزاحمت اور جدو جہد کریں، نااہل اور کرپٹ حکمرانوں نے ملک کو ڈیفالٹ کے چکر میں 25کروڑ عوام کو ڈیفالٹ کر دیا۔
ان کا کہنا تھا کہ اگر اس جاگیردار طبقے سے بھی ٹیکس لیا جائے تو بجلی و پیٹرول کی قیمتیں آدھی ہو سکتی ہیں، جاگیردار طبقے نے پورے سال میں صرف 4ارب روپے جبکہ ملازمت پیشہ طبقے نے 264ارب روپے کا ٹیکس ادا کیا، جاگیرداروں پر ٹیکس لگا کر پٹرول کی قیمتوں کو کم کیا جائے۔
