آکلینڈ: پاکستان کرکٹ ٹیم نے تیسرے ٹی 20 میچ میں شاندار کارکردگی کا مظاہرہ کرتے ہوئے نیوزی لینڈ کو 9 وکٹوں سے شکست دے دی۔ حسن نواز کی شاندار سنچری اور پاکستانی اوپنرز کی تیز بیٹنگ کی بدولت پاکستان نے 205 رنز کا پہاڑ جیسا ہدف 16 اوورز میں ہی حاصل کر لیا۔
پاکستان ٹیم نے سیریز کے ابتدائی دو میچز میں شکست کے بعد تیسرے میچ میں کرارا جواب دیا اور نیوزی لینڈ کی ٹیم کو 205 رنز کا ہدف دینے کے بعد اس ہدف کو 16 اوورز میں ہی پورا کر لیا۔
پاکستان نے ہدف کا تعاقب جارحانہ انداز میں کیا۔ اوپنرز محمد حارث اور حسن نواز نے پاور پلے کے 6 اوورز میں خوبصورت اور تیز بیٹنگ کی، جس کی بدولت سکور 74 تک پہنچا۔ محمد حارث نے 20 گیندوں پر 41 رنز کی اننگز کھیلی اور آؤٹ ہو گئے۔ اس کے بعد حسن نواز نے اپنی شاندار سنچری مکمل کی اور کپتان سلمان آغا نے بھی تیز رن ریٹ کے ساتھ کھیلتے ہوئے 51 رنز بنائے۔
نیوزی لینڈ کی ٹیم کو ابتداء میں ہی دھچکا لگا جب اوپنر فلن ایلن صفر پر آؤٹ ہو گئے۔ ٹم سیفرٹ اور مارک چیپمین نے اس کے بعد 40 رنز کا اضافہ کیا، مگر سیفرٹ 19 رنز پر آؤٹ ہو گئے۔ چیپمین نے شاندار 94 رنز کی اننگز کھیلی، جس میں 4 چھکے اور 11 چوکے شامل تھے۔
دیگر کھلاڑیوں میں ڈیرل مچل 17، جیمی نیشم 3، مچل ہیج 9 اور کائل جیمیسن بغیر کوئی رن بنائے آؤٹ ہوئے۔ کیوی کپتان مائیکل بریسویل نے 18 گیندوں پر 31 رنز بنائے، جس میں 2 چھکے اور 3 چوکے شامل تھے.
پاکستان کی جانب سے فاسٹ باؤلر حارث رؤف نے 3 وکٹیں حاصل کیں، جبکہ شاہین شاہ آفریدی، ابرار احمد اور عباس آفریدی نے 2، 2 وکٹیں حاصل کیں۔ شاداب خان نے ایک وکٹ لی۔
قبل ازیں پاکستان کے کپتان سلمان علی آغا نے میچ کے بعد کہا کہ ٹیم کا مقصد میچ میں فتح حاصل کرکے سیریز جیتنا ہے۔ انہوں نے بتایا کہ ٹیم میں عباس آفریدی اور ابرار احمد کو شامل کیا گیا ہے، جبکہ محمد علی اور جہانداد خان کو ٹیم سے ڈراپ کیا گیا ہے۔ نیوزی لینڈ کے کپتان مائیکل بریسویل نے کہا کہ وہ اس میچ میں فتح کے ساتھ سیریز جیتنا چاہتے ہیں۔
