وزیراعلی سندھ سید مراد علی شاہ نے کراچی کے انفرااسٹرکچر کو بہتر بنانے کے لیے ایک اہم قدم اٹھاتے ہوئے شاہراہِ بھٹو پر نئے کوریڈور کی تعمیر کا اعلان کیا ہے، جو قیوم آباد سے کراچی پورٹ تک جائے گا۔انہوں نے کہا کہ منصوبے کا مقصد بندرگاہ کے ٹریفک کو موٹر وے تک موثر رسائی دینا ہے، اور یہ ملک کے لاجسٹکس اور ٹرانسپورٹ نیٹ ورک کے لیے گیم چینجر ثابت ہوگا۔
اس حوالے سے اعلی سطح کا اجلاس وزیراعلی ہاوس میں ہوا، جس میں وزیر بلدیات سعید غنی، میئر کراچی بیرسٹر مرتضی وہاب، وزیراعلی کے معاون خصوصی برائے سرمایہ کاری قاسم نوید، چیف سیکریٹری آصف حیدر شاہ، چیئرمین پی اینڈ ڈی بورڈ نجم شاہ، کمشنر کراچی حسن نقوی، سیکریٹری بلدیات وسیم شمشاد، سیکریٹری ٹرانسپورٹ اسد ضامن، پروجیکٹ ڈائریکٹر نیاز سومرو اور دیگر افسران شریک ہوئے۔
وزیراعلی نے اس کوریڈور کی اہمیت پر زور دیتے ہوئے کہا کہ لنک روڈ کے علاوہ، جو نیشنل ہائی وے کو موٹر وے سے جوڑتی ہے، شاہراہِ بھٹو کا نیا کوریڈور (قیوم آباد سے پورٹ تک) بندرگاہ کے ٹریفک کو موٹر وے تک لے جائے گا۔
وزیراعلی نے کہا کہ شاہراہِ بھٹو کو کورنگی کازوے سے کاٹھور تک دسمبر 2025 کے آخر تک عوام کے لیے کھول دیا جائے گا، نیشنل ہائی وے کو موٹر وے سے جوڑنے والی لنک روڈ بھی جلد کھول دی جائے گی، جو پورٹ قاسم، لانڈھی اور کورنگی کے صنعتی علاقوں کی ٹریفک کو سہولت دے گی۔مراد علی شاہ نے کراچی پورٹ سے قیوم آباد تک کے اہم حصے کی تعمیر کی فوری ضرورت پر زور دیا، جو بندرگاہ کے ٹریفک کو موٹر وے تک براہِ راست اور بلاتعطل رسائی فراہم کرے گا۔
نجی فرم نے اس منصوبے کے لیے ڈیزائن-فنانس-آپریٹ-ٹرانسفر (ڈی ایف او ٹی) ماڈل کے تحت تجویز پیش کی ہے، جس میں جام صادق انٹرچینج سے کراچی پورٹ تک 16.5 کلومیٹر طویل سڑک کی تعمیر شامل ہے، جس میں بندرگاہ کی جانب 10.4 کلومیٹر کا فلائی اوور حصہ بھی شامل ہے، مجوزہ تعمیر قیوم آباد کو بوٹ بیسن، پھر ضیاالدین چورنگی اور ایسٹ وہارف سے جوڑے گی۔
وزیراعلی کی ہدایات کے مطابق اس کوریڈور کے منصوبے کے ساتھ ساتھ ٹریفک اسٹڈی بھی مکمل کی جا چکی ہے۔انہوں نے بتایا کہ شاہراہِ بھٹو مرکزی شاہراہ کے طور پر کام کرے گی، جو بھاری اور ہلکی ٹریفک دونوں کے لیے موزوں ہوگی، اور اس پر انٹرچینجز بھی ہوں گے تاکہ قریبی رہائشی علاقوں کو فائدہ پہنچے۔وزیراعلی نے پبلک پرائیوٹ پارٹنر شپ (پی پی پی) یونٹ کو ہدایت دی کہ وہ تمام وفاقی اور صوبائی اداروں سے فوری طور پر این او سیز حاصل کریں اور ماحولیاتی جائزہ بھی جلد مکمل کریں۔
مراد علی شاہ نے کراچی کے انفرااسٹرکچر کو بہتر بنانے کے لیے حکومت کے عزم کو دہراتے ہوئے بتایا کہ ریڈ لائن بی آر ٹی کی تعمیراتی کاموں میں تیزی لائی گئی ہے، جب کہ سہراب گوٹھ چورنگی کے دوبارہ ڈیزائن پر بھی کام جاری ہے، تاکہ ٹریفک کی روانی بہتر بنائی جا سکے۔وزیراعلی نے یقین دلایا کہ ان ترقیاتی منصوبوں کی تکمیل کے بعد نہ صرف رسائی بہتر ہوگی بلکہ شہر کی مجموعی شکل و صورت اور فعالیت میں نمایاں بہتری آئے گی، جس سے عوام کو براہ راست فائدہ پہنچے گا۔یہ پرعزم منصوبہ سندھ حکومت کی اس وسیع حکمتِ عملی کا حصہ ہے، جس کا مقصد کراچی کے ٹرانسپورٹ انفرااسٹرکچر کو جدید بنانا ہے، جو علاقے میں تجارت اور کاروباری سرگرمیوں میں نمایاں بہتری لا کر مقامی معیشت کو فروغ دے گا۔
