پاکستان اسٹاک ایکسچینج میں کاروباری استحکام برقرار ہے اور انڈیکس نے ایک بار پھر ایک لاکھ 67 ہزار کی حد عبور کر لی ہے۔ دوسری جانب تبادلہ مارکیٹ میں روپے کی قدر میں بہتری ریکارڈ کی گئی ہے اور ڈالر کی قیمت میں کمی واقع ہوئی ہے۔
کاروباری ہفتے کے دوسرے روز اسٹاک ایکسچینج میں زبردست تیزی دیکھی گئی۔ کاروبار کے آغاز پر 100 انڈیکس میں 1460 پوائنٹس کا نمایاں اضافہ ہوا، جس کے بعد انڈیکس ایک لاکھ 67 ہزار 703 پوائنٹس کی سطح پر پہنچ گیا۔
گزشتہ روز بھی مارکیٹ میں مثبت رجحان ریکارڈ کیا گیا تھا جس کے نتیجے میں انڈیکس ایک لاکھ 66 ہزار پوائنٹس کی حد عبور کرنے میں کامیاب ہوا تھا۔ مسلسل دو روز سے مارکیٹ میں جاری تیزی سرمایہ کاروں کے اعتماد کو ظاہر کر رہی ہے۔
دوسری جانب انٹر بینک مارکیٹ میں ڈالر کی قیمت میں 7 پیسے کمی ہوئی ہے، جس کے بعد ایکسچینج کمپنیز ایسوسی ایشن کے مطابق انٹر بینک میں ڈالر کی نئی قیمت 281 روپے ہو گئی ہے۔
