ملک میں سونے کی قیمتوں میں اتار چڑھاؤ کا سلسلہ جاری ہے اور قیمتوں میں ایک روز قبل استحکام کے بعد منگل کے روز سونا ایک مرتبہ پھر قابلِ ذکر حد تک سستا ہو گیا۔
خبر رساں ادارے اے پی پی کے مطابق آل پاکستان صرافہ جیمز اینڈ جیولرز ایسوسی ایشن نے بتایا ہے کہ 24 قیراط سونے کی فی تولہ قیمت میں 7 ہزار روپے کی کمی ریکارڈ کی گئی، جس کے بعد قیمت 4 لاکھ 30 ہزار 662 روپے سے کم ہو کر 4 لاکھ 23 ہزار 662 روپے تک آگئی۔
ایسوسی ایشن کے مطابق 24 قیراط سونے کے 10 گرام کی قیمت میں بھی 6 ہزار 2 روپے کی کمی دیکھی گئی اور یہ 3 لاکھ 69 ہزار 223 روپے سے گھٹ کر 3 لاکھ 63 ہزار 221 روپے رہ گئی۔ اسی طرح 22 قیراط سونے کے 10 گرام کی قیمت میں 5 ہزار 502 روپے کی کمی ہوئی، جس کے بعد قیمت 3 لاکھ 38 ہزار 466 روپے سے کم ہو کر 3 لاکھ 32 ہزار 964 روپے تک پہنچ گئی۔
عالمی مارکیٹ میں بھی سونے کے نرخوں میں نمایاں کمی ریکارڈ کی گئی ہے، جہاں اس کی قیمت 70 ڈالر کی کمی کے ساتھ 4 ہزار 83 ڈالر سے کم ہو کر 4 ہزار 13 ڈالر پر آ گئی۔ عالمی سطح پر طلب میں کمی اور مالیاتی منڈیوں میں غیر یقینی صورتحال کو اس کمی کی بڑی وجہ قرار دیا جا رہا ہے۔
چاندی کی قیمتیں بھی کمی کے رجحان سے محفوظ نہ رہ سکیں۔ ملک میں فی تولہ چاندی 123 روپے سستی ہو کر 5 ہزار 368 روپے سے کم ہو کر 5 ہزار 245 روپے رہ گئی۔ اسی طرح 10 گرام چاندی کی قیمت میں 106 روپے کمی ریکارڈ کی گئی، جس کے بعد یہ 4 ہزار 602 روپے سے گھٹ کر 4 ہزار 496 روپے ہو گئی۔
عالمی مارکیٹ میں بھی چاندی کی قیمت 1.23 ڈالر کم ہو کر 50.96 ڈالر سے کم ہو کر 49.73 ڈالر تک آگئی، جس سے عالمی دھاتوں کی مارکیٹ میں مجموعی مندی کے رجحان کی تصدیق ہوتی ہے۔
