آزاد جموں و کشمیر کی نئی 18 رکنی کابینہ نے اپنے عہدوں کا باضابطہ حلف اٹھا لیا۔ صدر بیرسٹر سلطان محمود کی علالت کے باعث حلف برداری کی ذمہ داری اسپیکر اسمبلی چوہدری لطیف اکبر نے انجام دی۔
حلف برداری کی تقریب میں وزیراعظم آزاد کشمیر راجہ فیصل ممتاز راٹھور بھی موجود تھے اور انہوں نے نو منتخب کابینہ اراکین کو مبارکباد پیش کی۔
سرکاری تفصیلات کے مطابق آج حلف اٹھانے والوں میں 16 وزراء اور 2 مشیر شامل ہیں، جنہیں مختلف محکموں کی ذمہ داریاں دی جائیں گی۔ دوسری جانب آزاد کشمیر حکومت کے دونوں مشیروں نے بھی اپنے عہدوں کا حلف اٹھا لیا ہے، جن سے حلف وزیراعظم راجہ فیصل ممتاز راٹھور نے لیا۔
تقریب کا ماحول رسمی اور پُروقار رہا، جبکہ کابینہ کی تشکیل کو نئی حکومت کے انتظامی ڈھانچے کی تکمیل میں اہم پیش رفت قرار دیا جا رہا ہے۔
