پاکستان نے آسٹریلیا کے شہر سڈنی میں پیش آنے والے فائرنگ کے افسوسناک واقعے کی شدید الفاظ میں مذمت کرتے ہوئے ہلاک اور زخمی ہونے والے شہریوں اور ان کے اہل خانہ کے ساتھ گہری ہمدردی اور تعزیت کا اظہار کیا ہے۔
صدرِ مملکت آصف علی زرداری نے واقعے پر ردِعمل دیتے ہوئے کہا کہ پاکستان خود دہشت گردی کا طویل عرصے تک شکار رہا ہے، اس لیے ایسے حملوں سے معاشروں کو پہنچنے والے درد، صدمے اور نقصان کو بخوبی سمجھتا ہے۔ انہوں نے کہا کہ پاکستان دہشت گردی کی ہر شکل اور ہر صورت کی مخالفت کرتا ہے اور اس مشکل گھڑی میں آسٹریلیا کی حکومت اور عوام کے ساتھ مکمل یکجہتی کا اظہار کرتا ہے۔
وزیراعظم شہباز شریف نے بھی فائرنگ کے واقعے کی مذمت کرتے ہوئے کہا کہ پاکستان ہر قسم کے دہشت گردانہ واقعات کے خلاف واضح اور دوٹوک مؤقف رکھتا ہے۔ انہوں نے کہا کہ اس المناک سانحے میں جاں بحق ہونے والوں کے لواحقین اور زخمیوں کے ساتھ ہماری ہمدردیاں ہیں اور پاکستان اس مشکل وقت میں آسٹریلوی عوام کے ساتھ کھڑا ہے۔
نائب وزیراعظم اسحاق ڈار اور وفاقی وزیر داخلہ محسن نقوی نے بھی واقعے پر گہرے دکھ اور افسوس کا اظہار کیا۔ محسن نقوی نے کہا کہ دہشت گردی انسانیت کے خلاف ایک ناقابلِ معافی جرم ہے اور پاکستان چونکہ خود اس عفریت سے متاثر رہا ہے، اس لیے آسٹریلوی عوام کے غم اور تکلیف کو بخوبی محسوس کرتا ہے۔
واضح رہے کہ آسٹریلیا کے شہر سڈنی کے علاقے بونڈی بیچ پر دو مسلح افراد نے شہریوں پر فائرنگ کر دی تھی، جس کے نتیجے میں 16 افراد جاں بحق اور 40 زخمی ہو گئے۔ پولیس کی جوابی کارروائی میں ایک حملہ آور مارا گیا جبکہ دوسرے کو زخمی حالت میں گرفتار کر لیا گیا ہے۔ واقعے کے بعد آسٹریلیا بھر میں سوگ کی کیفیت پائی جاتی ہے۔
