انٹرنیشنل کرمنل پولیس آرگنائزیشن (انٹرپول) نے ذلفی بخاری کے خلاف جاری تفتیش ختم کرنے کا فیصلہ کر لیا ہے۔
انٹرپول کی جانب سے ذلفی بخاری کے وکلا کو باقاعدہ خط ارسال کیا گیا ہے، جس میں انہیں تفتیش کے خاتمے اور جاری ریڈ نوٹس کی منسوخی سے آگاہ کیا گیا ہے۔
انٹرپول کے مطابق یہ فیصلہ ذلفی بخاری کے وکلا کی جانب سے دائر درخواست اور پاکستانی حکومت کی طرف سے فراہم کردہ تفصیلات اور شواہد کا تفصیلی جائزہ لینے کے بعد کیا گیا۔
ادارے کا کہنا ہے کہ دستیاب معلومات کی روشنی میں مزید تفتیش یا ریڈ نوٹس برقرار رکھنے کی ضرورت نہیں سمجھی گئی۔ اس فیصلے کے بعد ذلفی بخاری کے خلاف انٹرپول کی سطح پر جاری تمام کارروائیاں ختم ہو گئی ہیں، جسے ان کے قانونی حلقوں نے ایک اہم پیش رفت قرار دیا ہے۔
