اسلام آباد: عارف حبیب کنسورشیم نے قومی ائیر لائن پاکستان انٹرنیشنل ایئر لائنز کی نجکاری کے عمل میں کامیابی حاصل کرتے ہوئے 135 ارب روپے کی بولی کے ذریعے پی آئی اے کے 75 فیصد شیئرز خرید لیے ہیں۔
تفصیلات کے مطابق قومی ائیر لائن کی نجکاری کے لیے بولی کے تیسرے مرحلے میں عارف حبیب کنسورشیم نے 135 ارب روپے کی سب سے زیادہ بولی دی، جس کے نتیجے میں کنسورشیم پی آئی اے کے اکثریتی شیئرز حاصل کرنے میں کامیاب رہا۔
بولی کے اس مرحلے میں لکی کنسورشیم 134 ارب روپے کی بولی کے ساتھ دوسرے نمبر پر رہا۔ اس سے قبل بولی کے پہلے مرحلے میں لکی کنسورشیم نے 101.5 ارب روپے کی بولی لگائی تھی، جبکہ ائیربلیو نے 26 ارب 50 کروڑ روپے کی بولی دی تھی۔ پہلے مرحلے میں عارف حبیب کنسورشیم گروپ نے 115 ارب روپے کی سب سے زیادہ بولی دی تھی۔
دوسرے مرحلے میں لکی کنسورشیم نے اپنی بولی بڑھا کر 120.25 ارب روپے کی، جبکہ عارف حبیب کنسورشیم نے 121 ارب روپے کی نئی بولی جمع کرائی تھی۔
مشیر نجکاری کمیشن محمد علی کا کہنا ہے کہ قومی ائیر لائن کی نجکاری حکومت کے اصلاحاتی ایجنڈے کا حصہ ہے، حکومت کا مقصد قومی ائیر لائن کو محض فروخت کرنا نہیں بلکہ اسے اپنے پاؤں پر کھڑا کرنا ہے، جبکہ نجکاری کے عمل سے ملک میں سرمایہ کاری کے نئے مواقع پیدا ہوں گے۔
مشیر نجکاری کمیشن کے مطابق حکومت چاہتی ہے کہ قومی ائیر لائن ماضی کی طرح بہتر کارکردگی کا مظاہرہ کرے، بولی سے حاصل ہونے والی رقم کا 92.5 فیصد حصہ قومی ائیر لائن کی بہتری پر خرچ کیا جائے گا۔
انہوں نے مزید بتایا کہ دو تہائی ادائیگی ابتدا میں اور ایک تہائی ادائیگی بعد میں کی جا سکے گی، جبکہ بولی کے بعد بڈرز کو دو پارٹیز کو اپنے ساتھ شامل کرنے کی بھی اجازت دی گئی ہے۔
