کراچی: میئر کراچی مرتضیٰ وہاب نے پی ٹی آئی کے کراچی میں منعقدہ جلسے پر ردعمل دیتے ہوئے کہا ہے کہ باغِ جناح ایک بڑا گراؤنڈ ہے اور اس کو بھرنا کوئی آسان کام نہیں۔ انہوں نے کہا کہ جلسے میں شرکا کی تعداد خود اس بات کی عکاس ہے کہ عوامی حمایت کا دعویٰ زمینی حقائق سے مختلف ہے۔
خیبرپختونخوا کے وزیر اعلیٰ سہیل آفریدی کے کراچی میں جلسہ کرنے سے متعلق گفتگو کرتے ہوئے مرتضیٰ وہاب نے طنزیہ انداز میں کہا کہ اگر پی ٹی آئی کے پاس گراؤنڈ بھرنے کے لیے افراد موجود نہیں تھے تو وہ ہم سے کہہ دیتے، ہم انتظام کر دیتے۔ ان کا کہنا تھا کہ سیاسی جماعتوں کو دعوؤں کے بجائے حقائق کی بنیاد پر بات کرنی چاہیے۔
دوسری جانب وزیر مملکت بلال اظہر کیانی نے بھی پی ٹی آئی کے احتجاجی طرزِعمل پر تنقید کرتے ہوئے کہا کہ پُرامن احتجاج اور پی ٹی آئی دو بالکل الگ چیزیں ہیں۔ انہوں نے کہا کہ اپنے صوبے میں عوامی مسائل حل کرنے کے بجائے وزیر اعلیٰ خیبرپختونخوا دیگر صوبوں میں پہیہ جام کرنے کی بات کر رہے ہیں، جو مناسب طرزِ سیاست نہیں۔
واضح رہے کہ گزشتہ روز وزیر اعلیٰ خیبرپختونخوا سہیل آفریدی نے کراچی میں جلسہ منعقد کیا تھا۔ نمائش چورنگی پر خطاب کرتے ہوئے سہیل آفریدی نے الزام عائد کیا کہ مختلف مقامات پر ان کے کارکنان کے ساتھ پولیس گردی کی گئی، تاہم اس کے باوجود بڑی تعداد میں کارکنان جلسے میں شریک ہوئے۔
انہوں نے مزید کہا کہ پنجاب اور سندھ دونوں صوبوں میں ان کے ساتھ حکومتی رویہ مناسب نہیں رہا، تاہم اس کے بعد وہ خیبرپختونخوا میں اگلا پڑاؤ ڈالیں گے اور اسٹریٹ موومنٹ کے ذریعے بانی پی ٹی آئی کا پیغام ملک بھر میں پہنچائیں گے۔
