کراچی میں سیف سٹی کیمروں کے ذریعے ای چالان کے بعد اب موبائل فون کی ایک خصوصی ایپ کے ذریعے بھی ای چالان جاری کرنے کا سلسلہ شروع کیا جا رہا ہے، جس کے لیے پولیس کی جانب سے عملی اقدامات تیز کر دیے گئے ہیں۔
پولیس حکام کے مطابق اس مقصد کے لیے ایک خصوصی موبائل ایپ تیار کرالی گئی ہے، جس پر جلد ہی تجرباتی بنیادوں پر کام کا آغاز کیا جائے گا تاکہ نظام کی افادیت اور درستگی کو جانچا جا سکے۔
حکام کا کہنا ہے کہ یہ ایپ کراچی کے مجاز پولیس افسران کے ذاتی موبائل فونز میں ڈاؤن لوڈ کی جائے گی۔ دورانِ ڈیوٹی اگر کوئی پولیس افسر اپنے مقررہ علاقے میں کسی گاڑی کو ٹریفک قوانین کی خلاف ورزی کرتے ہوئے دیکھے گا تو وہ اسی ایپ کے ذریعے تصویر لے گا۔
پولیس حکام نے مزید بتایا کہ خودکار سسٹم کے تحت یہ تصویر براہِ راست ٹریفک پولیس کے ای چالاننگ افسر تک پہنچے گی، جو متعلقہ خلاف ورزی پر ای چالان جاری کرے گا، جبکہ جاری کیے گئے چالان میں متعلقہ پولیس افسر کی نشاندہی بھی شامل ہوگی۔
