پاکستان کرکٹ بورڈ (پی سی بی) نے قومی کھلاڑیوں کے لیے نئے سینٹرل کنٹریکٹس کا اعلان کر دیا ہے۔ تازہ ترین اعلان کے مطابق اس بار کسی بھی کھلاڑی کو اے کیٹیگری میں جگہ نہیں ملی، جبکہ سابق کپتان بابر اعظم اور وکٹ کیپر بلے باز محمد رضوان کو تنزلی کے بعد اے کیٹیگری سے بی کیٹیگری میں شامل کر لیا گیا ہے۔
پی سی بی کے بیان میں کہا گیا ہے کہ کارکردگی کی بنیاد پر بی، سی اور ڈی کیٹیگری میں 10، 10 کھلاڑیوں کو رکھا گیا ہے، جس کے تحت مجموعی طور پر 30 کرکٹرز کو کنٹریکٹس دیے گئے ہیں۔ یہ معاہدے یکم جولائی 2025 سے 30 جون 2026 تک نافذ العمل رہیں گے۔
بی کیٹیگری میں شامل دیگر نمایاں کھلاڑیوں میں شاہین شاہ آفریدی، فخر زمان، شاداب خان، ابرار احمد، حارث رؤف، حسن علی، صائم ایوب اور سلمان علی آغا کے نام شامل ہیں۔
سی کیٹیگری کے کھلاڑیوں میں عبداللہ شفیق، حسن نواز، فہیم اشرف، محمد حارث، محمد نواز، نسیم شاہ، نعمان علی، صاحبزادہ فرحان، ساجد خان اور سعود شکیل کو شامل کیا گیا ہے۔
ڈی کیٹیگری میں احمد دانیال، حسین طلعت، خرم شہزاد، خوشدل شاہ، محمد عباس، عباس آفریدی، محمد وسیم جونیئر، سلمان مرزا، شان مسعود اور سفیان مقیم کو رکھا گیا ہے۔
پی سی بی ذرائع کے مطابق بی کیٹیگری کے کھلاڑیوں کے معاوضوں میں کسی قسم کا اضافہ نہیں کیا گیا، اور تمام 10 کھلاڑی ہر ماہ 45 لاکھ روپے وصول کریں گے۔ تاہم، سی اور ڈی کیٹیگری کے کھلاڑیوں کی تنخواہوں میں 2 سے 4 لاکھ روپے کا اضافہ کر دیا گیا ہے۔ اس سے قبل سی کیٹیگری کے کرکٹرز ماہانہ 20 لاکھ جبکہ ڈی کیٹیگری کے کھلاڑی 12 لاکھ کما رہے تھے۔
یہ فیصلہ کھلاڑیوں کی حالیہ کارکردگی اور بورڈ کی پالیسی کو مدنظر رکھتے ہوئے کیا گیا ہے تاکہ میرٹ کی بنیاد پر کھلاڑیوں کی حوصلہ افزائی کی جا سکے۔
