عمران خان نے وفاقی کابینہ کا اہم ترین اجلاس کل طلب کر لیا ،آزادی مارچ کا جائزہ
وزیر اعظم عمران خان کی زیر صدارت وفاقی کابینہ کا اجلاس کل صبح ساڑھے گیارہ بجے وزیر اعظم افس میں ہوگا۔پرویز خٹک کابینہ کو رہبر کمیٹی کے ساتھ مذاکرات کی نشستوں پر بریفنگ دیں گے۔وفاقی کابینہ کے اجلاس میں آزادی مارچ کے حوالے سے بڑے فیصلے متوقع ہیں
اجلاس میں جے یو آئی( ف) اور انتظامیہ کے ساتھ ہونے والے معاہدے کا جائزہ لیا جائے گاجبکہ کابینہ کو وفاقی دارالحکومت سمیت ملک میں امن و امان کی صورتحال پر بھی بریفنگ دی جائے گی۔وفاقی کابینہ کے اجلاس کا13نکاتی ایجنڈہ بھی جاری کردیا گیا ہے۔کابینہ کو تمام وزارتوں اور ڈویژنز میں چیف ایگزیکٹو آفیسرز اور ایم ڈیز کی خالی پوسٹوں کی رپورٹ پیش کی جائے گی جبکہ کراچی، لاہور، پشاور اور ملتان میں بلند عمارتوں کی تعمیر کے حوالے سے پالیسی کی منظوری دی جائے گی۔
کابینہ اختیارات کی منتقلی سے متعلق سول ایوی ایشن رولز 1994 میں ترمیم کی منظوری دینےکے ساتھ ساتھ کابینہ آرٹسٹ ویلفیئر فنڈز کی کابینہ ڈویژن سے وزارت اطلاعات و نشریات کو منتقل کرنے کی منظوری دے گی۔اس کےعلاوہ نیشنل سیونگز کے ڈی جی کی تنخواہ و دیگر مراعات سمیت مکمل پیکج کی منظوری،اسلام آباد ہیلتھ کیئر فیسیلیٹیز مینجمنٹ ایکٹ 2019 کے مسودے کی منظوری اور پاکستان ایل این جی لمیٹڈ کے چیف ایگزیکٹو آفیسر،ایم ڈی کی ملازمت کا کنٹریکٹ ختم کرنے کی منظوری بھی ایجنڈے میں شامل ہے۔
کابینہ سوئی ناردرن گیس کمپنی کے بورڈ آف ڈائریکٹرز کی ازسر نو تشکیل کی منظوری دے گی جبکہ پاکستان ایل این جی لمیٹڈ کے بورڈ آف ڈائریکٹرز کی بھی ازسر نو تشکیل کابینہ کے ایجنڈے میں شامل ہے جبکہ گورنمنٹ ہولڈنگ پرائیویٹ لمیٹڈ کے بورڈ آف ڈائریکٹرز کی منظوری بھی کابینہ کےایجنڈے کا حصہ ہے۔کابینہ اجلاس میں متروکہ وقف املاک کے چیئرمین عامر احمد کی ایم پی ون کے تحت تنخواہ کی منظوری،وزیر اقتصادی امور کو نیشنل ایگزیکٹو کمیٹی کا رکن بنانے کی منظوری اورڈی جی ایم او،اور ڈی جی (سی) آئی ایس آئی کو جنرل کمیٹی کا ممبر بنانے کی منظوری بھی دے گی۔
