فلم اور ٹیلی ویژن کے لیجنڈ اداکار شکیل کا انتقال ہو گیا

کراچی: فلم اور ٹیلی ویژن کے لیجنڈ اداکار شکیل کا انتقال ہو گیا ہے، 85 سالہ مرحوم اداکار گزشتہ چند روز سے سی ایم ایچ اسپتال میں زیر علاج تھے۔

اداکار شکیل کے نام سے مشہور ہونے والے اداکار کا اصل نام یوسف کمال تھا۔ مرحوم اداکار کے پسماندگان میں ان کی اہلیہ فری، بیٹی حرا اور بیٹا حیدر شامل ہیں۔
ان کا کئی سال قبل بائی پاس ہوا تھا، انہیں جوڑوں کا مرض بھی لاحق تھا جس کی وجہ سے چلنے پھرنے میں دشواری ہوتی تھی، ایک ملازم ان کی اس سلسلے میں مدد کے لیے موجود ہوتا تھا۔

مرحوم اداکار شکیل کی پیدائش بھارتی شہر بھوپال میں ہوئی تھی لیکن ان کا آبائی وطن لکھنؤ تھا۔ انہوں نے تھیٹر اور ریڈیو پر بھی اپنے فن کا مظاہرہ کیا تھا۔
مرحوم اداکار کے شہرہ آفاق ڈراموں میں، نیا راستہ، شہ زوری، انکل عرفی، انتظار فرمائیے، انا، زیر زبر پیش، ان کہی، پرچھائیاں، افشاں، عروسہ، چاند گرہن، چچا اور آنگن ٹیڑھا شامل ہیں۔