کراچی کے علاقے فیڈرل بی ایریا میں ایک اسکول وین میں آگ لگنے سے ڈرائیور جھلس کر زخمی ہوگیا۔
پولیس کے مطابق واقعہ فیڈرل بی ایریا کے علاقے طاہر ولا چورنگی پر پیش آیا۔
پولیس کے مطابق گاڑی میں موجود بچوں کو فوری نکال لیا گیا، تاہم آگ لگنے سے اسکول وین مکمل جل گئی۔
دوسری جانب وین میں لگی آگ بجھانے کے دوران ڈرائیور جھلس گیا، جسے طبی امداد کے لیے اسپتال منتقل کردیا گیا۔
پولیس کے مطابق اسکول وین میں سلنڈر موجود تھا، تاہم فوری طور پر آگ لگنے کی وجوہات معلوم نہیں ہوسکیں۔
گذشتہ روز بھی کورنگی میں زمان ٹاؤن کلو چوک کے قریب ایک اسکول وین میں آگ لگ گئی تھی، حادثے میں تمام بچے محفوظ رہے، تاہم ڈرائیور معمولی زخمی ہوا تھا۔
اس سے قبل رواں ماہ 5 جنوری کو بھی کراچی کے علاقے اورنگی ٹاؤن میں قطر اسپتال کے قریب ایک اسکول وین میں آگ لگنے کے نتیجے میں 8 بچے جھلس کر زخمی ہوگئے تھے۔
اس واقعےکے بعد وزیر ٹرانسپورٹ سندھ اویس قادر شاہ نے تمام اسکول وینز کی فٹنس چیک کرنے کی ہدایت کی تھی۔
ترجمان وزیر ٹرانسپورٹ کی جانب سے جاری کیے گئے بیان میں کہا گیا تھا کہ جو اسکول وین چلنے کے قابل نہیں، اُس کا پرمٹ منسوخ کیا جائے۔
دوسری جانب شہر بھر میں گیس سلنڈر لگی اسکول وین چلانے پر پابندی عائد کردی گئی تھی، جس کے خلاف آل کراچی اسکول اینڈ کالجز وین ایسوسی ایشن کی جانب سے ہڑتال بھی کی گئی۔
