وزیراعظم شہباز شریف کا بیلاروس کے ایوان آزادی آمد پر پرتپاک استقبال کیا گیا۔

منسک میں بیلاروس کے صدر الیگزینڈلوکاشینکو نے وزیراعظم شہباز شریف کا ایوان آزادی آمد پر گلے مل کر پرتپاک استقبال کیا، اس موقع پر انہیں گارڈ آف آنر پیش کیا گیا، وزیراعظم شہباز شریف نے گارڈ آف آنر کا معائنہ کیا، دونوں ممالک کے قومی ترانے بھی بجائے گئے۔

بیلاروس کی افواج کے چاق و چوبند دستے نے وزیراعظم کو سلامی پیش کی، دونوں رہنماؤں نے اپنے وفود کا ایک دوسرے سے تعارف کرایا۔

اس موقع پر وزیراعظم شہباز شریف کے اعزاز میں باضابطہ استقبالیہ تقریب کا انعقاد کیا گیا ہے۔

وزیراعظم اور صدر بیلاروس کے درمیان دوطرفہ ملاقات ہوگی، دونوں رہنما وفود کی سطح پر ملاقات میں اپنے اپنے وفد کی قیادت کریں گے۔

اس موقع پر تجارت، معیشت، تعلیم اور دیگر شعبوں میں تعاون کے فروغ پر بات ہوگی، پاکستان اور بیلاروس کے درمیان کئی معاہدوں اور مفاہمتی یادداشتوں پر دستخط ہوں گے۔

ٹیگز: استقبال بیلاروس شہباز شریف صدر الیگزینڈلوکاشینکو