ملک بھر کے بجلی صارفین کے لیے ایک بڑی اور خوش آئند خبر سامنے آئی ہے، جس کے مطابق بجلی کی فی یونٹ قیمت میں ایک روپے 75 پیسے تک کمی متوقع ہے، جس سے صارفین کو ماہانہ بلوں میں نمایاں ریلیف حاصل ہو سکتا ہے۔
اس حوالے سے سینٹرل پاور پرچیزنگ ایجنسی (سی پی پی اے) نے مالی سال 2024-25 کی چوتھی سہ ماہی ایڈجسٹمنٹ کے تحت بجلی کی قیمتوں میں کمی کے لیے نیشنل الیکٹرک پاور ریگولیٹری اتھارٹی (نیپرا) سے باقاعدہ درخواست دائر کر دی ہے۔ نیپرا اتھارٹی اس درخواست پر آج باضابطہ سماعت کرے گی، جس کے بعد حتمی منظوری یا رد کیے جانے کا فیصلہ جاری کیا جائے گا۔
درخواست کی منظوری کی صورت میں ملک بھر کے بجلی صارفین کو مجموعی طور پر 53 ارب 39 کروڑ روپے سے زائد کا مالی ریلیف دیا جائے گا۔ اس سہ ماہی ایڈجسٹمنٹ کا اطلاق نہ صرف سرکاری ڈسٹری بیوشن کمپنیوں (ڈسکوز) پر ہوگا بلکہ اس میں کراچی کی کے الیکٹرک کمپنی بھی شامل ہو گی۔
ذرائع کے مطابق اگر نیپرا ستمبر، اکتوبر اور نومبر کے مہینوں کے لیے ایڈجسٹمنٹ کی منظوری دیتی ہے تو صارفین کو 2 روپے 10 پیسے فی یونٹ تک کا ریلیف حاصل ہو سکتا ہے، جب کہ اگست، ستمبر اور اکتوبر کے لیے بجلی کی فی یونٹ قیمت میں ایک روپے 75 پیسے تک کمی کی تجویز دی گئی ہے، جو کہ بجلی بلوں میں واضح کمی کا باعث بنے گی۔
نیپرا اتھارٹی کی جانب سے درخواست پر مکمل سماعت کے بعد ہی اس بارے میں حتمی فیصلہ جاری کیا جائے گا، جس کے تحت ریلیف کا اطلاق کیا جائے گا یا نہیں۔
