بلوچستان کے ضلع مستونگ میں سیکیورٹی فورسز نے خفیہ اطلاع پر کارروائی کرتے ہوئے بھارت کی سرپرستی میں سرگرم دہشت گرد گروہ کے 4 کارندوں کو ہلاک کر دیا، جبکہ بڑی مقدار میں اسلحہ اور بارود بھی برآمد کیا گیا۔
پاک فوج کے شعبہ تعلقات عامہ (آئی ایس پی آر) کے مطابق 12 ستمبر کو مستونگ میں آپریشن خفیہ اطلاعات کی بنیاد پر کیا گیا۔ اطلاع تھی کہ علاقے میں بھارت کے پراکسی نیٹ ورک “فتنہ الہندوستان” کے دہشت گرد موجود ہیں۔
بیان کے مطابق سیکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا، اور فائرنگ کے شدید تبادلے کے بعد بھارت کی سرپرستی میں کام کرنے والے 4 دہشت گرد مارے گئے۔
کارروائی کے دوران دہشت گردوں کے قبضے سے اسلحہ، گولہ بارود اور دھماکا خیز مواد بھی برآمد کیا گیا۔ آئی ایس پی آر کے مطابق یہ دہشت گرد علاقے میں متعدد تخریبی سرگرمیوں میں ملوث رہے تھے۔
آپریشن کے بعد علاقے کو مکمل طور پر کلیئر کرنے کے لیے سرچ اور سینیٹائزیشن آپریشن جاری ہے۔ آئی ایس پی آر نے دوٹوک مؤقف اختیار کیا ہے کہ ملک میں بھارتی سرپرستی میں ہونے والی دہشت گردی کو جڑ سے ختم کیا جائے گا اور ملوث عناصر کو انصاف کے کٹہرے میں لایا جائے گا۔
