ترکیے میں سکیورٹی فورسز نے دہشت گرد تنظیم داعش کے خلاف ملک بھر میں وسیع پیمانے پر کارروائیاں کرتے ہوئے ایک ہی دن میں 357 مشتبہ افراد کو گرفتار کر لیا ہے، جسے حالیہ عرصے کی بڑی انسدادِ دہشت گردی کارروائی قرار دیا جا رہا ہے۔
ترک وزیر داخلہ کے مطابق ملک کے 21 صوبوں میں بیک وقت انسدادِ دہشت گردی آپریشنز کیے گئے، جن کے نتیجے میں مجموعی طور پر داعش سے تعلق رکھنے والے 357 مشتبہ افراد کو حراست میں لیا گیا، جبکہ یہ کارروائیاں صوبائی پولیس، انسدادِ دہشت گردی یونٹس اور انٹیلی جنس اداروں کے باہمی تعاون سے انجام دی گئیں۔
وزارت داخلہ نے واضح کیا ہے کہ ترکیہ دہشت گردی کے خلاف زیرو ٹالرنس پالیسی پر سختی سے عمل پیرا ہے اور کسی بھی دہشت گرد تنظیم کو ملک کے اندر سرگرم ہونے یا اپنے نیٹ ورک مضبوط کرنے کی اجازت ہرگز نہیں دی جائے گی۔
استنبول کے چیف پبلک پراسیکیوٹر آفس کے مطابق شہر میں 110 ایسے مشتبہ افراد کو گرفتار کیا گیا ہے جو نئے سال کے موقع پر دہشت گردانہ کارروائیاں انجام دینے کی منصوبہ بندی کر رہے تھے، جبکہ ان کے خلاف شواہد بھی اکٹھے کیے گئے ہیں۔
دوسری جانب انقرہ کے چیف پبلک پراسیکیوٹر آفس نے داعش سے تعلق رکھنے والے 17 مشتبہ افراد کے وارنٹ گرفتاری جاری کیے جانے کی تصدیق کی ہے، جن میں 11 غیر ملکی شہری بھی شامل ہیں، جبکہ ان افراد کی گرفتاری کے لیے کارروائیاں جاری ہیں۔
سکیورٹی فورسز نے چند روز قبل بھی استنبول میں کارروائی کرتے ہوئے 100 سے زائد مشتبہ داعش ارکان کو گرفتار کیا تھا، جن کے قبضے سے بھاری مقدار میں اسلحہ اور دیگر ممنوعہ مواد برآمد کیا گیا تھا۔
ترک حکام کے مطابق گرفتار افراد نئے سال کے موقع پر بڑے پیمانے پر دہشت گردانہ حملوں کی منصوبہ بندی کر رہے تھے، تاہم بروقت کارروائیوں کے باعث ان عزائم کو ناکام بنا دیا گیا۔
