وفاقی وزیر داخلہ محسن نقوی نے کہا ہے کہ فتنہ الہندوستان سے تعلق رکھنے والے دہشت گرد اور ان کے سہولت کار دھرتی پر بوجھ ہیں اور ان کے خلاف کارروائی ناگزیر ہے۔ انہوں نے خاران میں دہشت گرد حملے کو پسپا کرنے پر سیکیورٹی فورسز کو خراجِ تحسین پیش کرتے ہوئے کہا کہ فورسز نے بروقت اور مؤثر کارروائی کے ذریعے دہشت گردوں کے مذموم عزائم کو خاک میں ملا دیا۔
وزیر داخلہ نے کہا کہ دہشت گردوں کو عبرتناک انجام تک پہنچانے والے سیکیورٹی اہلکار پوری قوم کے ہیرو ہیں۔ ان کا کہنا تھا کہ فتنہ الہندوستان کے دہشت گرد اور ان کے سہولت کار ملک کے امن اور استحکام کے لیے سنگین خطرہ ہیں، جن کے خاتمے کے لیے بھرپور اقدامات جاری رکھے جائیں گے۔
محسن نقوی نے مزید کہا کہ پوری قوم اپنی افواج کے ساتھ کھڑی ہے اور عوامی حمایت سے فتنہ الہندوستان کا مکمل صفایا کیا جائے گا۔ انہوں نے کہا کہ سیکیورٹی فورسز نے نہ صرف دہشت گرد حملوں کو ناکام بنایا بلکہ بروقت کارروائی کے ذریعے بڑے پیمانے پر تخریب کاری سے بھی ملک کو محفوظ رکھا۔
