متحدہ عرب امارات میں آج جنگی جہازوں اور ہیلی کاپٹروں پر مشتمل فضائی مارچ منعقد کیا جائے گا، جو عرب امارات پر حوثیوں کے حملے کی یاد میں ترتیب دیا جا رہا ہے۔ اس فضائی مارچ کے دوران جنگی طیارے اور ہیلی کاپٹر ملک بھر میں پرواز کریں گے اور قومی یکجہتی کا مظاہرہ کیا جائے گا۔
دبئی کے ولی عہد، نائب وزیرِاعظم اور وزیرِ دفاع شیخ حمدان بن محمد بن راشد آل مکتوم نے عوام سے اپیل کی ہے کہ وہ ہفتے کے روز صبح 11 بجے اماراتی قومی ترانے کی آواز پر یکجہتی کا اظہار کریں اور اس موقع پر قوم کے ساتھ کھڑے ہونے کا عملی پیغام دیں۔
یہ فضائی مارچ خاص طور پر اس حملے کی یاد میں منعقد کیا جا رہا ہے جس میں چار سال قبل حوثیوں نے متحدہ عرب امارات کو میزائلوں کا نشانہ بنایا تھا۔ اس حملے کے نتیجے میں تین افراد جاں بحق ہوئے تھے، جن میں ایک پاکستانی محنت کش معمور خان بھی شامل تھے، جو اس حملے میں اپنی جان سے ہاتھ دھو بیٹھے۔
حکام کے مطابق فضائی مارچ کا آغاز ابوظبی سے ہوگا اور یہ متحدہ عرب امارات کی تمام ریاستوں سے گزرتا ہوا مکمل کیا جائے گا، جس کا مقصد قومی اتحاد اور شہداء کو خراجِ عقیدت پیش کرنا ہے۔
