اسلام آباد: ملک بھر میں جاری مون سون بارشوں اور اس کے نتیجے میں پیدا ہونے والی سیلابی صورتحال نے شدید تباہی مچا دی ہے، جہاں ہر گزرتے دن کے ساتھ انسانی جانوں کا ضیاع، مالی نقصانات اور انفرااسٹرکچر کی بربادی میں اضافہ ہو رہا ہے۔
نیشنل ڈیزاسٹر مینجمنٹ اتھارٹی (این ڈی ایم اے) کی جانب سے جاری تازہ ترین رپورٹ کے مطابق گزشتہ 24 گھنٹوں کے دوران بارشوں اور سیلاب سے مزید 5 افراد زندگی کی بازی ہار گئے، جس کے بعد رواں مون سون سیزن کے دوران جاں بحق ہونے والوں کی مجموعی تعداد 221 تک پہنچ گئی ہے۔
رپورٹ میں بتایا گیا ہے کہ ان پانچ افراد میں سے چار کا تعلق خیبر پختونخوا سے ہے جبکہ ایک شخص سندھ میں پیش آنے والے واقعے کے دوران جان کی بازی ہارا۔ مختلف حادثات اور واقعات کے دوران گزشتہ ایک دن میں مزید 10 افراد زخمی ہوئے، جس سے زخمیوں کی مجموعی تعداد 592 ہو گئی ہے۔
این ڈی ایم اے کے مطابق ملک بھر میں بارش اور سیلاب سے اب تک 804 مکانات مکمل یا جزوی طور پر تباہ ہو چکے ہیں، جس کے باعث متعدد خاندان کھلے آسمان تلے زندگی گزارنے پر مجبور ہیں۔ اس کے علاوہ 200 سے زائد مویشی بھی ہلاک ہو چکے ہیں، جس سے دیہی علاقوں میں معاشی نقصان مزید بڑھ گیا ہے۔
مزید برآں، رپورٹ کے مطابق ملک کے مختلف علاقوں میں 9 پل سیلابی ریلوں کی زد میں آ کر تباہ ہوئے جبکہ مجموعی طور پر 10.5 کلومیٹر طویل سڑکوں کو شدید نقصان پہنچا ہے، جس سے آمد و رفت میں شدید مشکلات کا سامنا ہے اور متاثرہ علاقوں تک امدادی سرگرمیاں بھی سست روی کا شکار ہو رہی ہیں۔
