.سابق کپتان وقار یونس نے پی ایس ایل 10 کے ترانے کو شاندار قرار دے دیا
قومی کرکٹ ٹیم کے سابق کپتان، موجودہ کوچ اور معروف کمنٹیٹر وقار یونس نے پاکستان سپر لیگ سیزن 10 کے اینتھم کی کھل کر تعریف کی ہے۔
مائیکرو بلاگنگ ویب سائٹ ایکس پر جاری کردہ پیغام میں وقار یونس نے نہ صرف پی ایس ایل 10 کے ترانے کو زبردست قرار دیا بلکہ اس میں شامل گلوکاروں کی بھی تعریف کی۔ انہوں نے اپنے پیغام میں لکھا، “پی ایس ایل
کے لیے آپ سب نے کمال کا ترانہ تیار کیا ہے، آپ سب اسٹیڈیم میں دھمال مچانے جا رہے ہیں۔”
اپنے اس پیغام میں انہوں نے علی ظفر، بھنگڑا میوزک کے معروف گلوکار ابرار الحق، ریپر طلحہٰ انجم اور گلوکارہ نتاشہ بیگ کو بھی ٹیگ کیا۔
یاد رہے کہ گزشتہ ماہ وقار یونس نے رائے دی تھی کہ پاکستان سپر لیگ جیسی بڑی لیگ کے لیے چھ ٹیمیں کافی نہیں۔ ان کا کہنا تھا کہ انہوں نے چیئرمین پی سی بی محسن نقوی کو اس حوالے سے تجاویز دی ہیں، کیونکہ اتنے بڑے برانڈ کو مزید وسعت دی جانی چاہیے۔
