وزیراعلیٰ سندھ مراد علی شاہ نے کہا ہے کہ گل پلازہ میں لگنے والی آگ کے نتیجے میں ہونے والے مالی نقصانات کا ازالہ حکومت کی جانب سے کیا جائے گا، جبکہ متاثرہ افراد کو ہر ممکن ریلیف فراہم کرنے کے لیے اقدامات جاری رکھے جائیں گے۔
میڈیا سے گفتگو کرتے ہوئے وزیراعلیٰ سندھ نے کہا کہ اس وقت اولین ترجیح انسانی جانوں کو بچانا ہے اور پوری کوشش کی جا رہی ہے کہ جو افراد لاپتا ہیں وہ جلد از جلد بازیاب ہو جائیں، تاکہ متاثرہ خاندانوں کی بے چینی میں کمی لائی جا سکے۔
مراد علی شاہ نے کہا کہ کئی منزلہ عمارت کی تعمیر کی اجازت بغیر کسی جامع اسٹڈی کے دی گئی، جبکہ فائر آڈٹ کی بات کی جائے تو بلڈرز کی جانب سے یہ مؤقف اختیار کیا جاتا ہے کہ ان کے ساتھ ناانصافی ہو رہی ہے، جو ایک تشویشناک رویہ ہے۔
وزیراعلیٰ سندھ کا کہنا تھا کہ تاجروں کو جو مالی نقصان اٹھانا پڑا ہے اس کا ازالہ کیا جائے گا، تاہم جن افراد کی جانیں ضائع ہوئیں ان کا کوئی حقیقی ازالہ ممکن نہیں، کیونکہ انسانی جان کا نعم البدل نہیں ہو سکتا۔
انہوں نے مزید کہا کہ یہ انتہائی افسوسناک ہے کہ کچھ لوگ اس المناک سانحے پر بھی سیاست کر رہے ہیں۔ انہوں نے واضح کیا کہ پہلا فائر ٹینڈر بروقت موقع پر پہنچا تھا، اور اگر کسی بھی سطح پر کوتاہی ثابت ہوئی تو ذمہ داروں کو قانون کے مطابق سزا دی جائے گی۔
