اسلام آباد: رواں مالی سال کے پہلے پانچ ماہ جولائی سے نومبر 2025 کے دوران پاور سیکٹر کے سرکلر ڈیٹ میں 223 ارب روپے کا اضافہ ریکارڈ کیا گیا ہے، جس کے بعد بجلی کے شعبے کا مجموعی سرکلر ڈیٹ بڑھ کر 1 ہزار 837 ارب روپے تک پہنچ گیا، جو جون 2025 میں 1 ہزار 614 ارب روپے تھا۔
ذرائع کے مطابق سرکلر ڈیٹ میں ایک ہزار 225 ارب روپے کمی کے معاہدوں کے دو ماہ گزرنے کے باوجود پاور سیکٹر کے گردشی قرضے میں اضافہ دیکھنے میں آیا ہے۔
ذرائع کا کہنا ہے کہ ستمبر 2025 میں حکومت نے بینکوں کے ساتھ معاہدے کیے تھے، تاہم اس کے بعد اکتوبر اور نومبر 2025 کے دو ماہ کے دوران پاور سیکٹر کا سرکلر ڈیٹ مزید 144 ارب روپے بڑھ گیا۔
ذرائع کے مطابق نومبر 2025 تک بجلی کے شعبے کا سرکلر ڈیٹ 1 ہزار 837 ارب روپے رہا، جو ستمبر 2025 میں 1 ہزار 693 ارب روپے اور جون 2025 میں 1 ہزار 614 ارب روپے تھا۔ اس طرح رواں مالی سال کے ابتدائی پانچ ماہ میں جون کے مقابلے میں سرکلر ڈیٹ میں مجموعی طور پر 223 ارب روپے کا اضافہ سامنے آیا ہے۔
ذرائع کا مزید کہنا ہے کہ نومبر 2024 کے مقابلے میں نومبر 2025 میں پاور سیکٹر کے سرکلر ڈیٹ میں 544 ارب روپے کی کمی ظاہر ہوتی ہے، کیونکہ نومبر 2024 تک بجلی کے شعبے کا سرکلر ڈیٹ 2 ہزار 381 ارب روپے تھا۔
واضح رہے کہ ستمبر 2025 میں پاور سیکٹر کے گردشی قرضے میں کمی کے لیے وفاقی حکومت اور 18 کمرشل بینکوں کے درمیان معاہدوں پر دستخط کیے گئے تھے۔
