بالی وڈ کنگ شاہ رخ خان کی فلم ’زیرو‘ آج سے سینما گھروں کی زینت بنی جس میں ان کے ساتھ اداکارہ انوشکا شرما اور کترینہ کیف جلوہ گر ہوئیں۔
فلم میں شاہ رخ خان بونے کے کردار میں ‘بوا سنگھ’ بنے ہیں جب کہ ان کے ساتھ اداکارہ انوشکا شرما بطور ‘عافیہ’ ایک معزور لڑکی اور کترینہ کیف بطور ‘حسن جہاں ببیتا’ کا کردار نبھا رہی ہیں۔
فلم ’زیرو‘ آنند ایل رائے کی ہدایت کاری میں بنائی گئی ہے جس کی تشہیر گزشتہ ماہ سے جاری تھی تاہم آج فلم بینوں کا انتظار ختم ہوا اور شائقین کی بڑی تعداد نے سینما گھروں کا رخ کیا۔
فلم دیکھنے کے بعد فلم بینوں کی جانب سے ملے جلے ردعمل کا اظہار کیا جارہا ہے اور سوشل میڈیا پر فلم سے متعلق شائقین برملا اظہار کر رہے ہیں۔
بھارتی نامور فلمی تجزیہ کار ترن آدرش نے فلم ’زیرو‘ کو ناکام قرار دیتے ہوئے 1 اسٹار کی ریٹنگ دی اور لکھا کہ ’آنند ایل رائے اور شاہ رخ خان کے ساتھ کام کرنے کی وجہ سے امید زیادہ تھی لیکن کہانی میں جھول ہے اور فلم کے دوسرے حصے میں کہانی تنزلی کی طرف جاتی ہے، انہوں نے فلم کو مایوس کن بھی قرار دیا۔
فلم بینوں کی جانب سے تعریفیں بھی سمیٹی جارہی ہیں جب کہ کچھ کا کہنا ہے کہ انہیں شاہ رخ خان کی فلم متاثر کرنے میں ناکام رہی۔
شائیقین فلم کے لیے ناپسندیدگی کا اظہار کرتے ہوئے کہا کہ اب سمجھ آیا کہ سلمان خان نے اس فلم سے کیوں انکار کردیا تھا۔
