اسلام آباد : سپریم کورٹ میں پروسیجر بل کے حوالے سے کیس سماعت کیلئے مقرر کردیا گیا ہے۔ چیف جسٹس عمر عطا بندیال کی سربراہی میں آٹھ رکنی لارجربنچ تشکیل دیدیا گیا ہے۔کیس کی سماعت کل ہوگی ۔
پاک الرٹز کے مطابق لارجر بینچ میں جسٹس اعجاز الاحسن، جسٹس منیب اختر ،جسٹس مظاہر نقوی،جسٹس محمد علی مظہر،جسٹس عائشہ ملک ،جسٹس سید حسن اظہر رضوی، جسٹس شاہد وحید شامل ہیں۔
سپریم کورٹ میں مجوزہ قانون پریکٹس اینڈ پروسیجر ایکٹ کے خلاف کیخلاف دو آئینی درخواستیں دائر کردی گئیں۔
درخواستیں چودھری غلام حسین اور راجہ عامر خان نامی شہریوں نے ایڈووکیٹ طارق رحیم اور اظہر صدیق کی وساطت سے دائر کیں جن میں وفاق، وزارت قانون، وزیر اعظم کے پرنسپل سیکرٹری اور صدر عارف علوی کے پرنسپل سیکرٹری کو فریق بنایا گیا ہے۔
درخواستوں میں موقف اختیار کیا گیا ہے کہ مجوزہ سپریم کورٹ پریکٹس پروسیجر بل بد نیتی پر مبنی ہے، مجوزہ بل آئین کیساتھ فراڈ ہے۔
درخواستوں میں عدالت سے استدعا کی گئی ہے کہ مجوزہ بل کو غیر آئینی غیر قانونی قرا دے کر کالعدم کیا جائے۔ آئینی درخواست پر فیصلہ ہونے تک مجوزہ قانون کو معطل کیا جائے ۔
