فیصل آباد: رانا ثناء اللہ کا کہنا ہے کہ پاکستان میں دہشت گردی کی کارروائیوں میں ’’را‘‘ کا ہاتھ ہے، بھارتی ایجنسی ’’را‘‘ دہشتگردوں کی ماں کا کردار ادا کررہی ہے، بلوچستان میں کسی گرینڈ آپریشن کی ضرورت نہیں ہے۔
وزیراعظم کے مشیر برائے سیاسی امور رانا ثناء اللہ کا کہنا ہے کہ پاکستان میں دہشتگردی کی کارروائیوں میں را کا ہاتھ ہے، پاکستان میں مختلف گروپس ہیں، ان کے خیالات آپس میں نہیں ملتے، ان سب کو اکٹھا کرنے والی بھارتی ایجنسی ’’را‘‘ ہے، ’’را‘‘ دہشتگردوں کی ماں کا کردار ادا کررہی ہے، بھارتی ایجنسی مجرمانہ، سفاکانہ کارروائیوں کیلئے فنڈز اور اسلحہ فراہم کررہی ہے۔
وزیراعظم کے مشیر برائے سیاسی امور نے کہا کہ سیکیورٹی فورسز نے چند گھنٹوں میں مسافروں کو بازیاب کرالیا، تمام مسافروں کو بازیاب کرایا جاچکا ہے، بھارتی میڈیا ٹرین واقعے میں لاپتہ افراد کا پروپیگنڈا کررہا ہے۔
ان کا کہنا ہے کہ بلوچستان میں گرینڈ آپریشن کی ضرورت نہیں، انٹیلی جنس بیسڈ آپریشن آئے روز ہورہے ہیں، کوئی گرینڈ آپریشن نہیں ہوتا، فورسز دہشت گردوں کو جہنم واصل کررہی ہیں، فورسز کے جوان جانوں کے نذرانے بھی پیش کررہے ہیں۔
رانا ثناء اللہ نے کہا کہ پوری قوم کو اپنے شہداء اور غازیوں کے ساتھ کھڑے ہونا چاہئے، انشاء اللہ دہشتگرد جلد نست و نابود ہوں گے۔
