ایران اور اسرائیل کے درمیان جنگ بندی کے بعد پاکستان اسٹاک ایکسچینج (پی ایس ایکس) میں تیزی کا رجحان تیسرے روز بھی برقرار رہا، جس کے باعث کاروبار کا آغاز مثبت انداز میں ہوا۔
تفصیلات کے مطابق پی ایس ایکس میں آج بینچ مارک 100 انڈیکس میں 565 پوائنٹس کا نمایاں اضافہ ریکارڈ کیا گیا، جس کے بعد انڈیکس 1,23,327 پوائنٹس کی سطح پر پہنچ گیا۔ سرمایہ کاروں کا اعتماد بحال ہونے کے باعث مارکیٹ میں سرگرمی بڑھی اور حصص کی خریداری میں اضافہ دیکھا گیا۔
دوسری جانب زرمبادلہ کی مارکیٹ میں بھی مثبت رجحان دیکھنے میں آیا، جہاں انٹر بینک میں امریکی ڈالر 12 پیسے سستا ہوگیا۔ ڈالر کی قیمت 283.72 روپے سے کم ہو کر 283.60 روپے پر آ گئی، جو ملکی معیشت کے لیے ایک معمولی مگر خوش آئند پیش رفت ہے۔
معاشی ماہرین کا کہنا ہے کہ جنگ بندی کی وجہ سے خطے میں غیر یقینی صورتحال میں کمی آئی ہے، جس کا براہِ راست اثر سرمایہ کاری کے ماحول پر پڑا ہے، اور اس کے اثرات پاکستان کی مالیاتی منڈیوں میں بھی واضح طور پر محسوس کیے جا رہے ہیں۔
