شہرِ قائد میں ٹریفک قوانین کے نفاذ کو مزید مؤثر بنانے کے لیے کراچی ٹریفک پولیس نے ای ٹریکس نظام کے تحت ای چالان کے اجرا کے لیے روبوٹس متعارف کرانے کا فیصلہ کیا ہے۔
ڈی آئی جی ٹریفک پیر محمد شاہ نے ایک تقریب سے خطاب میں بتایا کہ کراچی میں ای چالان کے لیے ایک تیسرا طریقہ متعارف کرایا جا رہا ہے جو روبوٹس کے ذریعے عمل میں لایا جائے گا۔
انہوں نے کہا کہ آئندہ ماہ مختلف شاہراہوں پر ’’نو پارکنگ‘‘ اور ’’نو ٹو لین‘‘ کے بورڈز نصب کیے جائیں گے، جبکہ صدر، طارق روڈ اور دیگر اہم سڑکوں پر روبوٹس گشت کریں گے۔ ان روبوٹس کی رفتار 20 کلومیٹر فی گھنٹہ ہوگی۔
ڈی آئی جی کے مطابق یہ روبوٹس چلتے ہوئے گاڑیوں کو اسکین کریں گے، اور جو بھی گاڑیاں پارکنگ یا ٹریفک قوانین کی خلاف ورزی کریں گی، انہیں خودکار طریقے سے ای چالان جاری کیا جائے گا۔
واضح رہے کہ کراچی میں ای ٹریکس سسٹم کے تحت صرف دو ہفتوں میں تقریباً 50 ہزار شہریوں کے خلاف ٹریفک قوانین کی خلاف ورزی پر ای چالان جاری کیے جا چکے ہیں۔
