بالی ووڈ انڈسٹری ایک بار پھر تنازع کا شکار ہوگئی ہے، جب نورا فتیحی، شردھا کپور اور سدھارتھ کپور سمیت متعدد فنکاروں کے نام انڈرورلڈ ڈان داؤد ابراہیم کی مبینہ ڈرگ پارٹیوں سے جوڑ دیے گئے ہیں۔ بھارتی میڈیا رپورٹس کے مطابق ممبئی پولیس کے اینٹی نارکوٹکس سیل نے داؤد ابراہیم سے منسلک ایک ممکنہ بین الاقوامی ڈرگ نیٹ ورک کی تحقیقات کے دوران کئی معروف شخصیات کے نام سامنے آنے کا دعویٰ کیا ہے۔
بھارتی خبر رساں ایجنسی پی ٹی آئی کا کہنا ہے کہ اس نیٹ ورک کا مرکزی کردار سلیم ڈولا نامی شخص تھا، جبکہ اس کے بیٹے طاہر ڈولا کے بیانات نے معاملے کو مزید سنگین بنا دیا ہے۔ حکام کے مطابق سلیم ڈولا ملک اور بیرون ملک ایسی پارٹیاں منعقد کرتا تھا جن میں نہ صرف داؤد ابراہیم کی بھانجی علیشاہ پارکر شریک ہوتی تھیں بلکہ فیشن اور فلم انڈسٹری سے وابستہ متعدد مشہور چہرے بھی موجود ہوتے تھے۔
رپورٹس کے مطابق طاہر ڈولا کو بیرونِ ملک سے گرفتار کیا گیا اور اگست میں بھارت واپس لایا گیا، جہاں اس نے تفتیش کے دوران مبینہ طور پر انکشاف کیا کہ ان پارٹیوں میں فلم ساز، ریپرز، ماڈلز اور اداکار باقاعدگی سے شرکت کرتے تھے۔ تحقیقات کے دوران شردھا کپور، نورا فتیحی اور سدھارتھ کپور سمیت کئی فنکاروں کے نام بھی سامنے آئے ہیں۔
نورا فتیحی نے انسٹاگرام پر جاری اپنے بیان میں تمام الزامات کی سختی سے تردید کرتے ہوئے کہا کہ وہ ایسی پارٹیوں میں شرکت نہیں کرتیں، کیونکہ وہ مسلسل کام اور سفر کے باعث مصروف رہتی ہیں۔ انہوں نے میڈیا رپورٹس کو جھوٹ اور بے بنیاد قرار دیا اور کہا کہ ان کا نام بلاوجہ اسکینڈلز میں گھسیٹا جا رہا ہے جبکہ ان کا ان افراد یا ایسی کسی سرگرمی سے کوئی تعلق نہیں ہے۔
نورا فتیحی کا کہنا تھا کہ یہ پہلی بار نہیں کہ ان کی ساکھ خراب کرنے کی کوشش کی جارہی ہے، تاہم اس مرتبہ وہ خاموش نہیں رہیں گی اور اس معاملے پر اپنا مؤقف بھرپور انداز میں سامنے لائیں گی۔
