آئی سی سی ٹی ٹونٹی ورلڈ کپ 2026ء کے گروپس اور پاک بھارت مقابلے کی تفصیلات سامنے آ گئیں۔
میڈیا رپورٹ کے مطابق 20 ٹیموں کو 4 گروپس میں 5، 5 ٹیموں کے ساتھ تقسیم کیا جائے گا اور ہر گروپ سے ٹاپ دو دو ٹیمیں سپر 8 مرحلے کے لیے کوالیفائی کریں گی۔
رپورٹ میں کہا گیا ہے کہ پاکستان اور بھارت کی ٹیمیں ایک گروپ میں شامل ہوں گی اور یہ ہائی وولٹیج میچ 15 فروری کو کولمبو میں ہو گا۔
میڈیا رپورٹ کے مطابق پاکستان اور بھارت ہے ساتھ دیگر ٹیمیں نیدرلینڈز، نمیبیا اور یو ایس اے کے ہونے کا امکان ہے جبکہ مشترکہ میزبان سری لنکا کے گروپ میں آسٹریلیا، زمبابوے ، آئرلینڈ اور عمان شامل ہوں گے۔
میڈیا رپورٹ میں کہا گیا ہے کہ انگلینڈ، ویسٹ انڈیز، بنگلہ دیش، نیپال اور اٹلی ایک گروپ میں شامل ہیں جبکہ جنوبی افریقہ، نیوزی لینڈ، افغانستان، یو اے ای اور کینیڈا کے ایک گروپ میں شامل ہونے کا امکان ہے۔
آئی سی سی ٹی ٹونٹی ورلڈ کپ 7 فروری سے 8 مارچ تک کھیلا جائے گا جس کے باضابطہ شیڈول کا اعلان 25 نومبر کو کیا جائے گا۔
بھارت میں میچز ممبئی، کولکتہ، چنائی، دہلی اور احمد آباد میں ہوں گے جبکہ سری لنکا میں میچز کولمبو اور کینڈی میں کھیلے جائیں گے۔ خیال رہے کہ پاکستان ٹیم اپنے میچز سری لنکا میں کھیلے گا جبکہ احمد آباد کو فائنل کے لیے منتخب کیا گیا ہے اور پاکستان کے پہنچنے کی صورت میں فائنل کولمبو میں ہو گا۔
سیمی فائنلز کےلئے ممبئی اور کولکتہ کو چنا گیا ہے مگر وینیوز کا انحصار سیمی فائنلسٹ ٹیموں پر ہو گا، پاکستان کے پہنچنے کی صورت میں سیمی فائنل سری لنکا میں ہی کھیلا جائے گا۔
