امریکا نے 19 ممالک سے تعلق رکھنے والے تارکینِ وطن کی تمام امیگریشن درخواستیں روک دی ہیں، جن میں گرین کارڈ اور امریکی شہریت کی درخواستیں بھی شامل ہیں۔ امریکی میڈیا کے مطابق ان ممالک کی امیگریشن درخواستیں معطل کرنے کا حکم جاری کیا گیا ہے، جن میں افغانستان، ایران، لیبیا، میانمار، صومالیہ، سوڈان، ترکمانستان، یمن اور دیگر ممالک شامل ہیں۔
نیویارک ٹائمز کی رپورٹ کے مطابق پابندی کا اطلاق ان ممالک کے اُن شہریوں پر ہوگا جن پر ٹرمپ انتظامیہ نے جون میں یو ایس سٹیزن شپ اینڈ امیگریشن سروسز کے ذریعے اسٹیٹس حاصل کرنے پر پابندی لگائی تھی۔ رپورٹ کے مطابق ایسے تمام کیسز جن کی منظوری یا حتمی فیصلہ ہونا باقی تھا، انہیں بھی روک دیا گیا ہے۔
یو ایس سٹیزن شپ اینڈ امیگریشن سروسز کے مطابق ان ممالک سے تعلق رکھنے والے تارکینِ وطن کے تمام کیسز پر کارروائی وقتی طور پر معطل کر دی گئی ہے۔ ان میں وہ درخواستیں بھی شامل ہیں جو امریکی شہریت حاصل کرنے کے آخری مراحل میں تھیں۔
واضح رہے کہ ٹرمپ انتظامیہ کی جانب سے یہ فیصلہ حال ہی میں سامنے آنے والے ایک واقعے کے تناظر میں کیا گیا ہے، جس میں ایک افغان شہری نے وائٹ ہاؤس کے قریب فائرنگ کر کے ایک نیشنل گارڈ کو ہلاک جبکہ دوسرے کو شدید زخمی کر دیا تھا۔ اس واقعے کے بعد امریکی حکام نے افغان پاسپورٹ پر سفر کرنے والے افراد کے ویزوں کا اجرا بھی روک دیا تھا، جبکہ اسائلم سے متعلق تمام درخواستوں کے فیصلے بھی معطل کر دیے گئے تھے۔
