لندن: میئر لندن صادق خان نے کنجیشن چارج میں بڑی تبدیلیوں کا اعلان کرتے ہوئے الیکٹرک گاڑیوں کے لیے دی جانے والی مکمل رعایت ختم کر دی ہے، جس کے بعد آج سے الیکٹرک گاڑیوں پر بھی کنجیشن چارج لاگو ہو گیا ہے۔
برطانوی میڈیا کے مطابق میئر لندن صادق خان نے کنجیشن چارج پالیسی میں تبدیلی کرتے ہوئے کہا ہے کہ الیکٹرک گاڑیوں کے لیے دی گئی رعایت اب برقرار نہیں رکھی جائے گی، جس کے نتیجے میں اب الیکٹرک گاڑیاں بھی ٹریفک فیس ادا کرنے کی پابند ہوں گی۔
میڈیا رپورٹس کے مطابق 2 جنوری 2026 سے ایک نیا رعایتی نظام نافذ کیا جائے گا، جس کے تحت رعایت حاصل کرنے کے لیے آٹو پے سسٹم میں رجسٹریشن کو لازمی قرار دیا گیا ہے۔ نئے نظام کے مطابق الیکٹرک کاروں کو 25 فیصد جبکہ بڑی الیکٹرک وینز اور دیگر بڑی الیکٹرک گاڑیوں کو 50 فیصد رعایت دی جائے گی۔
برطانوی میڈیا کا کہنا ہے کہ روزانہ کنجیشن چارج 15 پاؤنڈ سے بڑھا کر 18 پاؤنڈ کر دیا گیا ہے، جبکہ مقررہ وقت کے بعد ادائیگی کی صورت میں یہ چارج 21 پاؤنڈ تک وصول کیا جائے گا۔
اس حوالے سے میئر لندن صادق خان نے مؤقف اختیار کیا کہ ٹریفک میں کمی لانا معیشت کے لیے ناگزیر ہے، جبکہ کلینر وہیکل ڈسکاؤنٹ ابتدا ہی سے ایک عارضی اقدام تھا، جسے مستقل پالیسی کے طور پر جاری نہیں رکھا جا سکتا۔
