اسلام آباد: اسلام آباد کی ڈسٹرکٹ اینڈ سیشن کورٹس نے شراب اور اسلحہ برآمدگی کے مقدمے میں اہم پیش رفت کرتے ہوئے علی امین گنڈاپور کو اشتہاری قرار دے دیا ہے۔
جوڈیشل مجسٹریٹ مبشر حسن چشتی کی جانب سے جاری کردہ تحریری فیصلے میں پولیس کو ہدایت کی گئی ہے کہ ملزم کی گرفتاری کے بعد اسے فوری طور پر عدالت میں پیش کیا جائے۔ عدالت نے واضح کیا کہ ملزم کی عدم حاضری اور گرفتاری سے بچنے کے طرزِ عمل کے باعث یہ فیصلہ کیا گیا ہے۔
عدالتی فیصلے کے مطابق ہیڈ کانسٹیبل نے عدالت کو آگاہ کیا کہ علی امین گنڈاپور کے خلاف دفعہ 87 کے تحت اشتہاری کارروائی مکمل کر لی گئی ہے اور اس حوالے سے پولیس رپورٹ بھی عدالت میں جمع کرا دی گئی ہے۔
تحریری فیصلے میں کہا گیا ہے کہ دستیاب شواہد اور رپورٹس سے ظاہر ہوتا ہے کہ ملزم روپوش ہو چکا ہے، جس کے باعث عدالت نے اسے اشتہاری قرار دینے کا حکم دیا۔ عدالت نے ملزم کے ضمانتی مچلکے منسوخ کرتے ہوئے اس کے دائمی وارنٹ گرفتاری بھی جاری کر دیے ہیں۔
عدالت نے مزید حکم دیا کہ علی امین گنڈاپور کو اشتہاریوں کی فہرست میں شامل کیا جائے اور اس کے ضمانتی کے خلاف بھی قانونی کارروائی شروع کی جائے۔ عدالتی ریکارڈ کے مطابق یہ مقدمہ تھانہ بارہ کہو میں درج ہے۔
